Боловсролын сайд Л.Энх-Амгалан ЭЕШ-ын талаар мэдээлэл хийлээ.

Тэрбээр "Монгол Улсын Засгийн газрын өнөөдрийн хуралдаанд миний бие мэдээлэл хийсэн. Долоодугаар сарын 1-4-ний өдрүүдэд зохион байгуулахаар төлөвлөсөн ЭЕШ-ыг наймдугаар сарын сүүлийн хагаст зохион байгуулах шийдвэр гаргалаа. 

Учир нь нэгдүгээрт, Энэ жил нийт 40,420 хүүхэд ЭЕШ өгөхөөр бүртгүүлсэн. Харин өнөөдрийн байдлаар эдгээр хүүхдүүдийн 1500 орчим нь халдвар авч, нэгдүгээр хавьтал болсон.

Хоёрдугаарт, ЭЕШ-ыг зохион байгуулах 9,620 багшаас тодорхой тооны багш нь халдвар авсан. Мөн Улаанбаатар хотоос хөдөө орон нутагт очиж шалгалт авах 66 багшийн 10 орчим нь халдвар авч, шалгалт авах боломжгүй болсон.

Гуравдугаар, 7600 орчим хүүхэд сумдуудаас 21 аймагт очиж шалгалт өгөхөөр бүртгүүлсэн. Гэтэл өнөөдрийн байдлаар есөн аймаг өндөржүүлсэн бэлэн байдал зарлаж, хатуу хөл хорио тогтоогоод байна. Тэгэхээр эдгээр хүүхдүүд сумаас аймаг руу очиж шалгалтаа өгөх боломжгүй болж байгаа юм. Эдгээр хүчин зүйлүүдээс шалтгаалан ЭЕШ-ыг хойшлуулахаар боллоо. Долоодугаар сарын 10-ны өдөр яг хэдний өдөр зохион байгуулах хугацааг зарлах болно. 

Өнөөдрийн байдлаар 30982 хүүхэд нь коронавирусний вакцины хоёрдугаар тунгаа хийлгэсэн байна. Харин наймдугаар сарын сүүлийн хагас гэхэд ЭЕШ-т өгөх хүүхдүүд дархлаажуулалтдаа бүрэн хамрагдсан байна гэж тооцоолж байгаа. ЭЕШ-ыг хойшлуулснаар хүүхдүүдийн мэргэжлээ сонгох, суралцахад ямар ч сөрөг нөлөө үзүүлэхгүй. Их дээд сургуулиудын консерциумтай ярилцаж тохиролцсон байгаа" гэв. 

Б.Баатар