Засгийн газрын өнөөдрийн ээлжит хуралдаанаар Үндэсний их баяр наадмыг үзэгчгүй цахимаар явуулахаар шийдвэрлэсэн. Гэвч иргэдийн зүгээс цахим наадам зохион явуулахын оронд нэг удаадаа алгасаж, оронд нь нөхцөл байдал хүндэрсэн энэ үед нэн шаардлагатай байгаа салбартаа зарцуулахыг уриалж буй.

Мөн зарим гишүүдийн зүгээс нөхцөл байдал дээрдсэн үед наадам хийх нь илүү зөв шийдэл байсан талаар өөрийн цахим хаягаараа дамжуулан бичжээ. Тухайлбал, УИХ-ын гишүүн Ж.Сүхбаатар “Цахим наадамд бусадтайгаа адил манай гэр бүл “цахимаар оролцоно”. Харамсалтай нь, өнгөрсөн жилийн цахим гэх наадмаас харахад наадсан сайхан дурсамж үлддэггүй юм билээ.

Миний хувьд нөхцөл байдлаа харж байгаад 8 дугаар сард өвчин зовлон багассан үед хийе гэсэн. Хүлээн авсангүй. Үндэсний хэмжээний цар тахал ид дэлгэрсэн үед өвчин шаналал дунд найр наадам хийнэ гэдэг үнэхээр оновчгүй шийдэл!” гэжээ.