Улсын онцгой комисс хуралдаж, дараах шийдвэрийг гаргажээ.

Энэ талаар УОК-ын нарийн бичгийн дарга Т.Баярхүү "Халдварт өвчин судлалын үндэсний төв, Эрүүл мэндийн яам, холбогдох байгууллагуудын коронавирусний нөхцөл байдал, цаашид авч хэрэгжүүлэх ажлын талаарх санал зөвлөмжүүдийг УОК-ын хуралдаанаар хэлэлцэн шийдвэрлэлээ.

Нэгдүгээрт, Хөл хорио тогтоох саналыг Эрүүл мэндийн яамнаас оруулж ирээгүй. Харин тодорхой үйлчилгээнүүдийг хязгаарлаж, тандалт хийх санал оруулж ирсэн. Хүн амын дунд халдварт өвчний тархалт нэмэгдэх хандлагатай байгаа учир зургаадугаар сарын 25-наас эхлэн халдвар тархах өндөр эрсдэл бүхий газрууд болох бялдаржуулах төвүүд, фитнес, бассейн, сауны үйл ажиллагааг 10 хоног хязгаарлахаар боллоо.

Хоёдугаарт, хоолны газруудын танхимаар үйлчлэх болон амралт жуулчны баазуудын газруудад тогтоосон хязгаарлалтыг 10 хоног сунгаж байна.

Гуравдугаарт, 12-оос дээш насны хүүхдүүдийг файзер вакцин хийх ажлыг өргөн хүрээнд зохион байгуулах шийдвэр гаргалаа.

Өнөөдрийн байдлаар 19 аймгийн 176 суманд тодорхой хэмжээний хязгаарлалтыг тогтоогоод байна. Тиймээс хот хоорондын хөдөлгөөнийг хаах асуудлыг өнөөдрийн хуралдаанаар хэлэлцээгүй. Хотоос гарах хөдөлгөөн хэвийн үргэлжилнэ. Тиймээс хөдөө орон нутгийг зорих иргэд тухайн аймаг, сумдынхаа онцгой комиссоос ямар шаардлага биелүүлэх талаарх нарийн мэдээллийг авч, зорчих шаардлагатай. 

Улсын онцгой комисс иргэдийг гэр бүлийн хүрээнд агаар салхинд гарахыг дэмжиж ажиллаж байгаа. Гэтэл хариуцлагагүй хүмүүс бөөгнөрөл үүсгэх явдал ихээр гарч байна. Тиймээс иргэд аль болох сахилга хариуцлагаа дээшлүүлж, гэр бүлийн хүрээнд агаар салхинд гарахыг дахин зөвлөж байна. 

Цаашид халдварын нөхцөл байдал хүндэрч, хяналтаас гарч, халдвар улам нэмэгдвэл, хязгаарлалт тогтоох асуудлыг УОК хэлэлцэн тухай бүрт нь шийдвэр гаргах болно" гэв.

Б.Баатар