Хууль зүйн байнгын хороогоор өнөөдөр хэлэлцсэн Өршөөлийн тухай хуульд эрхээ хасуулсан бөхчүүд болон харваачдыг нэг удаа өршөөх агуулга багтсан. Энэ дагуу допинг хэрэглэсэн бөхчүүд, дүрэм зөрчсөн харваачдын эрх сэргэж, Үндэсний их баяр наадамд оролцох нөхцөл үүсээд буй. Тэгвэл УЕПГ-аас энэ нь Үндсэн хууль зөрчсөн үйлдэл гэх албан бичгийг Х.Нямбаатар сайдад илгээсэн байна.

УЕПГ албан бичигтээ “Үндсэн хуулийн 14 дүгээр зүйлийн 1-т, Монгол Улсад хууль ёсоор оршин суугаа хүн бүр хууль, шүүхийн өмнө эрх тэгш байна. 2-т, Хүнийг үндэс, угсаа, хэл, арьсны өнгө, нас, хүйс, нийгмийн гарал, байдал, хөрөнгө чинээ, эрхэлсэн ажил, албан тушаал, шашин шүтлэг, үзэл бодол, боловсролоор нь ялгаварлан гадуурхаж үл болно. Хүн бүр эрх зүйн этгээд байна” гэсэн заалттай зөрчилдөж байгаа тул хасах санал хүргүүлж байна” гэж бичжээ.