УИХ-ын Хууль зүйн байнгын хорооны өчигдрийн хуралдаанаар "Өршөөл үзүүлэх тухай" хуулийн төслийг хаалттай горимоор хэлэлцэн, дэмжсэн билээ.
Уг хуульд Үндэсний баярын наадмын тухай хуулиар эрхээ хасуулсан бөх, сур харваачдын үндэсний их баяр наадамд оролцох эрхийг нэг удаа өршөөн сэргээхээр тусгасан нь олон нийтийн шүүмжлэлийг дагуулаад байна.
Хэрэв хуулийг эцэслэн баталбал 2019 онд допингийн хэргээр эрхээ хасуулсан улсын аварга Э.Оюунболд, 2020 онд допинг илэрсний улмаас барилдах эрхээ 11 сараар хасуулсан улсын аварга Н.Батсуурь, улсын арслан Р.Пүрэвдагва, улсын харцага болсон Б.Бат-Орших, допинг илэрсний улмаас барилдах эрхээ хоёр жилээр хасуулсан улсын начин Д.Цэрэнтогтох, сур харваач Х.Даваацэцэг нар өршөөлд хамрагдах нөхцөл бүрдээд байгаа юм.
Харин Улсын ерөнхий прокурорын орлогч М.Чинбат Хууль зүй, дотоод хэргийн сайд Х.Нямбаатарт өчигдөр албан бичиг илгээсэн. Үүнд, "Үндсэн хуулийн 14 дүгээр зүйлийн 1-т, Монгол Улсад хууль ёсоор оршин суугаа хүн бүр хууль, шүүхийн өмнө эрх тэгш байна. 2-т, Хүнийг үндэс, угсаа, хэл, арьсны өнгө, нас, хүйс, нийгмийн гарал, байдал, хөрөнгө чинээ, эрхэлсэн ажил, албан тушаал, шашин шүтлэг, үзэл бодол, боловсролоор нь ялгаварлан гадуурхаж үл болно.
Хүн бүр эрх зүйн этгээд байна" гэсэн заалттай зөрчилдөж байгаа тул хуулийн төслийн дээрх заалтыг хасах санал хүргүүлж байна" гэсэн юм.
Өршөөлийн тухай хуулийн төслийг Хууль зүйн байнгын хороо өнөөдөр үргэлжлүүлэн хэлэлцэх бөгөөд энэ үеэр дээрх зөрчилтэй заалтыг хасахгүйгээр баталсан тохиолдолд Үндсэн хууль зөрчсөн гэдгээр Үндсэн хуулийн Цэцэд очих нь тодорхой болчихлоо.
У.Тэргэл