Ерөнхий сайд асан С.Баярыг өнөөдөр магадлангаар суллажээ. Тодруулбал, С.Баяр нь Булган аймгийн Булган суманд байрлах 439 дүгээр хаалттай хорих ангид ял эдэлж байсан бөгөөд тус аймгийн шүүхээс С.Баярыг магадлангаар суллах шийдвэр гаргасан гэдгийг эх сурвалж мэдээлэв. 

Хэргийг эргэн сануулбал, С.Баярыг Монгол Улсын Ерөнхий сайдаар ажиллаж байхдаа Монгол Улсын Засгийн газрын 2009 оны аравдугаар сарын 6-ны өдрийн “Гарын үсэг зурах эрх олгох тухай” 308 дугаартай тогтоолоор стратегийн орд болох Оюутолгой төслийн хүрээнд Айвенхоу Майнз Монголия Инк, Айвенхоу Майнз Лимитед, Рио Тинто Интернэшнл Холдингс Лимитед компаниудтай хөрөнгө оруулалтын гэрээг үзэглэх эрхийг нэр бүхий Засгийн газрын гишүүдэд олгож, мөн өндөр хөрөнгө оруулалтын гэрээ байгуулах нөхцөл бүрдүүлсэн гэх үндэслэлээр анхан шатны шүүхээс таван жилийн хорих ял оноосон байдаг

Улмаар өнгөрсөн оны арванхоёрдугаар сард С.Баяр нарт холбогдох хэргийн Давж заалдах шатны шүүх хянан хэлэлцээд С.Баярт оноосон 5 жилийн хорих ялыг 2.6 жил болгон бууруулах шийдвэр гаргасан юм. 

Б.Баатар