Улсын Дээд шүүх өнөөдөр С.Баярцогт, Б.Бямбасайхан, Б.Ариунсан, Д.Ганболд, Б.Бадрал нарт холбогдох хэргийг хэлэлцэж, шүүх бүрэлдэхүүн шийдвэрээ гаргасан байна. Шүүхээс С.Баярцогтод холбогдох хэргийг тусгаарлаж, мөрдөн байцаалтад буцаасан байна. 

Энэ талаар С.Баярцогтын өмгөөлөгч Г.Орхон "С.Баярцогтод оноосон Анхан болон Давж заалдах шатны шүүхийн шийдвэрүүд хүчингүй болж, дахин мөрдөн байцаалтад буцаалаа. Улсын Дээд шүүх анхан болон давж заалдах шатны шүүхийн шийдвэр нь хууль ёсны байх шаардлагыг хангахгүй байна. Прокуророос С.Баярцогтод оноосон яллах дүгнэлт нь нотлох баримтаар тогтоогдохгүй байна гэсэн үндэслэлээр хэргийг тусгаарлаж, мөрдөн байцаалтад буцаасан.

Өмгөөлөгчдийн зүгээс энэ асуудлыг удаа дараагийн шүүх хурлуудад тавьж байсан. Бид шүүхийн хараат бус, нөлөөнд автахгүй байдлыг хүндэтгээд олон нийтэд дэлгэрэнгүй мэдээлэл өгөөгүй. Хэрэг мөрдөн байцаалтад буцаж байгаа учраас  энэ талаар мэдээлэл өгөх болно.

Шударга ёс тогтож, энэ хэрэг үнэн мөнөөр шийдэгдэх тодорхой хэмжээний гэрэл гэгээ гарч байгаад баяртай байна" гэлээ. 

Ташрамд өгүүлэхэд, Анхан шатны шүүхээс С.Баярцогтод нийтийн албанд ажиллах эрхийг таван жилээр хасаж, 10 жил хорих ял оноон, үл хөдлөх эд хөрөнгүүд, оффшор бүсээс Швейцарын банкаар дамжуулан угаасан 1.3 сая ам.долларыг улсын орлого болгохоор шийдвэрлэсэн юм.

Харин Давж заалдах шатны шүүх өнгөрсөн оны арванхоёрдугаар сарын 4-нд уг хэргийг хэлэлцээд Анхан шатны шүүхээс оноосон ялыг бууруулж, С.Баярцогтыг дөрвөн жил найман сар хорихоор болсон билээ.

Б.Баатар