Боловсрол, шинжлэх ухааны сайд Л.Энх-Амгалан “Намар хичээлийг тогтсон хугацаанд нээхийн тулд чармайн ажиллана. Есдүгээр сарын 1-нд хичээлээ эхлүүлэхээр аймаг орон нутаг, сургууль, цэцэрлэгийн удирдлагуудад үүрэг, чиглэл өгч бэлтгэл ажлаа хангаж эхлээд байгаа. Гэхдээ эцсийн шийдвэрийг Засгийн газар гаргана гэдгийг ойлгох хэрэгтэй” гэлээ.
Үүнтэй холбогдуулан ирэх наймдугаар сард орон даяар ерөнхий боловсролын сургуульд шинээр элсэх зургаан настнуудын бүртгэл, элсэлтийг цахимаар зохион байгуулах чиглэлийг БШУЯ-наас өгсөн байна.
Өнгөрсөн жилийн тухайд ерөнхий боловсролын сургуулийн нэгдүгээр ангийн бүртгэлийг наймдугаар сарын 3-наас эхлүүлж, 28-ныг хүртэл үргэлжилж, нийтдээ 39 мянга гаруй зургаан настан сурагч болж байв. Цар тахлын улмаас сүүлийн хоёр жилийн хугацаанд сурагчид цахимаар хичээллэсэн билээ.