Ерөнхий сайд Л.Оюун-Эрдэнэ "Токио-2020" зуны Олимпийн наадамд оролцож, анхны гадаад улс орон дахь айчлалаа эхлүүлэхээр Япон улсыг баг тамирчдын хамт зорьсон билээ. 

Өнөөдөр буюу 2021 оны долоодугаар сарын 22-ны өдөр Ерөнхий сайд Л.Оюун-Эрдэнэ, Япон улсын Ерөнхий сайд Суга Ёшихидэтэй албан ёсны уулзалт хийлээ. 

Цар тахлын хүнд үед Олимпийн наадмыг зохион байгуулах түүхэн сорилттой үед биечлэн хүрэлцэн ирсэнд мөн анхны гадаад айлчлал гуравдахь хөрш Япон улсаас эхэлсэнд Ерөнхий сайд Суга Ёшихидэ талархал илэрхийлэв. 

Ерөнхий сайд Л.Оюун-Эрдэнэ Монгол Улс 1961 онд НҮБ-д элсээд эхний оролцсон Олимпийн наадам 1964 оны Токиогийн олимп байсныг дурдаад, Монгол Улс Япон улстай дипломат харилцаа тогтоосны 50 жилийн ой ирэх жил тохиож байгаа тул энэ айлчлал түүхэн ач холбогдолтойг онцлон тэмдэглэж, ардчилсан хувьсгалын шилжилтийн цаг хугацаанд хамгийн том түнш орны нэг байсанд, мөн цар тахлын хүнд үед дэмжлэг үзүүлж байгаад талархал илэрхийлэв. 

Ойн хүрээнд Япон улсын Цог Жавхлант Эзэн хаан Нарухитог Монгол Улсад айлчлахыг урьжээ. Талууд цаашид худалдаа, эдийн засаг, бүс нутгийн хамтын ажиллагааны чиглэлд идэвхтэй хамтран ажиллахаа илэрхийлсэн байна.

Хамтын ажиллагааны хүрээнд Хөшигийн хөндийд баригдсан “Чингис хаан”олон улсын нисэх онгоцны буудлыг цогцоор өргөтгөж, эдийн засаг, мэдээлэл технологи, аялал, жуулчлалын чөлөөт бүс болгон хөгжүүлэх, нийслэл Улаанбаатар хотын түгжрэлийг бууруулахад чиглэсэн Улаанбаатар хотыг тойрсон хурдны зам болон Богд хаан төмөр замын асуудал, мэдээлэл технологийн салбарт хувийн хэвшлийн хамтын ажиллагааг идэвхжүүлэх болон тус салбарын инженерүүдийг бэлтгэх, нүүрсний орд газруудыг түшиглэн устөрөгчийн цахилгаан станц баригдах техник эдийн засгийн үндэслэлд хамтран ажиллах зэрэг томоохон эдийн засгийн хамтын ажиллагааны чиглэлээр санал солилцжээ.

Уулзалтын төгсгөлд Ерөнхий сайд Суга Ёшихидэ сумогийн шинэ аваргатай болсонд талархал илэрхийлж, өөрийн нутгийн нохой бэлэглэжээ. Ерөнхий сайд Л.Оюун-Эрдэнэ маргааш хүндэт зочдын хамт Цог Жавхлант Эзэн Хаанд бараалхана. Мөн эрх баригч Либераль ардчилсан намын Ерөнхий нарийн бичгийн дарга Т.Никай, Япон, Монголын парламентын бүлгийн гишүүдтэй уулзалт хийнэ.