Монгол Улсад хэлмэгдүүлэлт газар авсан талаар хүн бүр ярьж, шүүмжилж байна. Бүр хэнд ял өгөх, өгөхгүй талаар “Хонгил”-ынхон гэх өмгөөлөгч Б.Баасанцогт болон түүний хамаарал бүхий этгээдүүдийн хамтарч гаргасан зураглал ил болж олныг шуугиулаад авсан.  Тодруулбал, түүний шүүгч, прокурор, цагдаа нарт мөнгө өгсөн байж болзошгүй баримт хэвлэлээр цацагдаж, үүнээс хуулийн байгууллагынхан нийлж ялын зураглал гаргадаг, хилс хэрэг хүлээлгэх, хэлмэгдүүлэлт эндээс ихтэй гэх шүүмжлэл гараад байгаа юм.

Хуулийнхны ялын “зохиол”-ын талаар УИХ-ын гишүүн Ц.Мөнх-Оргил “Монголд улстөрийн хэлмэгдүүлэлт газар авчээ. М.Энхсайхан, С.Баяр, С.Баярцогт нарыг нэрлэж болно.

Хэлмэгдүүлэлтийг хийгээд байгаа шүүгч, прокурор, мөрдөн байцаагч, АТГ-ын ажилтнууд, тэднийг өөгшүүлдэг, зуучилдаг, схем зурдаг, ажлынхаа өрөөнд олон төрлийн сценарь бичиж үүгээр зүйлчилнэ, энэ зүйл ангиар хэрэгт татна зэргээр зохиол бичдэг хууль хяналтын байгууллагынхныг бодож тунгаамаар байна.

Тэднийг одоо ажиллаж байгаа шүүгч, прокурорууд хараад сууж байгаа шүү дээ. Ямар хариуцлага тооцох нь уу, яах нь уу харъя гээд. Би хэлмэгдүүлээд албан тушаал, хэдэн төгрөгтэй болоод үлдэнэ гэж бодно шүү дээ. Ямар ч албан тушаалтан байсан би хүн хэлмэгдүүлж, ял оногдуулж болдоггүй юм байна. Үүнээс болж би өөрөө хатуу хариуцлага хүлээх юм байна гэдгийг ойлгуулахгүй бол хэлмэгдүүлэлт хэзээ ч дуусахгүй” гэсэн байдаг.

“Хонгил”-ын гэх тодотголтой өмгөөлөгч Б.Баасанцогт ба түүний нөхдийн ил үйлдэл хуулийн салбарт салхи сэвэлзэх шаардлагатай гэдгийг харуулсан хамгийн тод жишээ юм. Тэгвэл хамгийн сүүлийн мэдээллээр өмгөөлөгч Б.Баасанцогтыг шалгаж эхэлсэн бөгөөд түүнтэй хоолонд орсон, холбоо сүлбээтэй байж болзошгүй гэх асуудлаар хяналтын прокурор Г.Батбаярыг үүрэгт ажлаас нь түдгэлзүүлж мөн шалгаж байна.

Өмгөөлөгч Б.Баасанцогт болон түүний нөхөдтэй холбоотой шалгагдаж байгаа хэргүүд хэзээ нэг тийш болж, иргэдийн эргэлзээ тайлагдах вэ. Мэдээж УИХ-ын гишүүн Ц.Мөнх-Оргилын хэлсэн шиг асуудлыг яаралтай нэг тийш цэгцэлж, хуулийн эсрэг ажиллавал хүлээх хариуцлага хатуу байдаг гэдгийг тэдэнд ойлгуулахгүй бол ялзрал, завхрал хэзээ ч арилахгүй гэдэг нь тодорхой байна.

Б.Лхам