Цагдаагийн алба хаагчид хоёр залууг хэрцгийгээр зодож танхайрч буй видео бичлэг цахим орчинд түгж, нийгмийг бухимдуулаад буй. УЕПГ-ын дэргэдэх Мөрдөн байцаах албыг татан буулгаснаас хууль, хяналтын байгууллагынхны энэ мэт бусдыг зодож танхайрах, дарамтлах, олон цаг, өдрөөр цагдан хорих, гавлаж байгаад эрүүдэн шүүх явдал гаарч, дураараа авирлах нь ихэссэн.
Шүүгч, өмгөөлөгчид нь авлигын “хонгил” бий болгож, прокуроруудыг хүртэл татан оролцуулсан бүлэглэл бий болж, цагдаа, мөрдөгчид нь жирийн иргэдээр ийнхүү “гарын зугаа” хийж байгааг сүүлийн үеийн олон жишээнээс харж болно.
Харин УЕПГ-ын дэргэдэх Мөрдөн байцаах алба байхад тэд ийн дураараа авирлаж чаддаггүй, айхгүй ч аягүй гэгчээр үйлдлээ хянадаг байлаа. Өдгөө зодуулж, дарамтлуулсан иргэд цагдаагийн байгууллагад гомдол гаргаад ч нэмэргүй. Учир нь, цагдаа цагдаа шалгана гэсэн үг юм. Саяын энэхүү явдал хоёр жилийн өмнөх хэмээж буй. Гэвч цагдаагийн байгууллагын бодит байдлыг илчилсэн нь чухал болохоос цаг хугацааны хувьд тэгтлээ ач холбогдол өгөх шаардлагагүй юм.
Монгол Улсын Ерөнхий сайд Л.Оюун-Эрдэнэ уг асуудлыг яаралтай шалгаж, хуулийн хариуцлага тооцуулах үүргийг Хууль зүй, дотоод хэргийн сайд Х.Нямаатарт үүрэг өгсөн. Ниргэсэн хойно нь хашгирав гэгчээр цагдаа, мөрдөн байцаагчид одоо л ийн аашилж байгаа мэтээр үүрэг даалгавар өгч сүржигнэх шаардлагагүй юм.
Харин ч эсрэгээрээ салбараа удирдан чиглүүлж авч явах чадавхгүй, чадваргүй сайддаа хариуцлагын асуудлыг ярих учиртай юм. Хууль зүй, дотоод хэргийн сайд Х.Нямбаатар хуулийн олон төсөл санаачилсан. Иргэдийн амьдралд хэрэгтэй нь бий ч, дарамт болж буй нь түүнээсээ олон. Түүний санаачлан, батлуулсан Зөрчлийн тухай хуулиар торгуулаагүй Монгол Улсын иргэн цөөн. Мөн БНХАУ-аас олон зуун сая төгрөгөөр цахим гав оруулж ирж, иргэдийг хянана гэсэн. Өдгөө түүнийгээ хэрэглэж, шүүхээс энэ төрлийн ял оноож буй нь ховор.
Энэ мэт “бай”-гаа оноогүй, бодит амьдралаас хол хөндий хуулиудаа бөөцийлж суух Х.Нямбаатар сайд салбараа нуран унаж буйг огт анзаарсан шинжгүй сууна. Салбар нь ийн уруудан доройтож буйд тэрбээр хариуцлага хүлээн, огцрох учиртай. Иргэн буруу зүйл хийсэн ч гэлээ цагдаа нарын гарын шүүс болох учиргүй юм.
У.Тэргэл
Сэтгэгдэл (9)