Төрийн албаны зөвлөлийн дарга Б.Баатарзоригийг 2019 оны хоёрдугаар сарын 11-ний өдөр тус албанд томилж байв. Тэрбээр уг албанд томилогдсоныхоо дараа "Зөвд зөөлөн, бурууд хатуу ажиллана. Зөрчил дутагдалтай эвлэрэхгүй. Олон түмэн, иргэдийн төрд итгэх итгэлийг нэмэгдүүлнэ" гэдгийг тодотгож байсан.
Тэгвэл өдгөө олон түмэн бүү хэл төрийн сайд ч Төрийн албаны зөвлөлд итгэхгүй байгаа гэдгээ мэдэгдлээ.
БШУ-ын сайд Л.Энх-Амгалан "Бүтцийн өөрчлөлт хийж чадварлаг багтай ажиллахыг Монгол Улсын Засгийн газар дэмжсэн байхад Төрийн албаны зөвлөлийн түшмэдүүд шинэчлэлийнхээ эсрэг байр суурьтай байгаад харамсаж байна.
Сонгууль бүрийн дараа улстөрийн шалтгаанаар халагддаг мянга мянган иргэдийнхээ төлөө юу ч дуугардаггүй байж шинэчлэл хийе гэхээр яамдын угжны хурга шиг дарга нарыг өмөөрч Төрийн албаны шинэчлэлийн өмнө бул чулуу шиг хөндөлсдөг байж таарахгүй. Төрийн албаны зөвлөл нь өөрөө яамыг цомхон чадварлаг багаар ажиллуулах хүсэлгүй. Уг нь энэ цомхон чадварлаг болгох шинэчлэл бол яамдын түүхэнд хийгдэж байгаа анхных нь. Гэтэл манлайлж оролцох ёстой Төрийн албаны зөвлөл нь эсрэг байр суурьтай байгаад үнэхээр харамсаж байна.
Төрийн албаны зөвлөлийг Монголын төрийг цомхон, чадварлаг байлгахын төлөө сэтгэл, зүрхтэй байх юм бодсон чинь шинэчлэлийг дэмжих биш шинэчлэлийн чөдөр тушаа болоод сууж байдаг хүмүүс юм байна" гэдгийг онцолсон.
Энэ нь Төрийн албаны зөвлөлийн дарга Б.Баатарзоригийн суудлаасаа буух томоохон шалтгаан мөн. БШУ-ын сайд Л.Энх-Амгалан Төрийн албаны зөвлөлийн үнэн нүүр царайг илчиллээ гэдгийг олон нийт хэлж байна.
Ер нь сүүлийн үед Төрийн албаны зөвлөлтэй холбоотой таагүй мэдээлэл нэлээд цацагдаж буй. Саяхан гэхэд коронавирусний цар тахлын үед Засгийн газар төсвөө хэмнэж, үргүй зардал гаргахгүй байхыг үүрэгдсэн ч Төрийн албаны зөвлөл 670 сая төгрөгийг үр ашиггүй үрсэн талаарх мэдээлэл ч гарсан. Түүнчлэн УИХ-ын гишүүн гишүүн М.Оюунчимэгийн хүү болох Б.Энхмөрөнг Төрийн албаны тухай хуулийг зөрчин Эрүүл мэндийн даатгалын сангийн Худалдан авалт, гэрээлэлтийн газрын даргаар томилуулсан явдалд Төрийн албаны зөвлөл хайнга хандсан зэрэг асуудал хүртэл гарч байсан.
Ямартай ч энэ мэт нь Төрийн албаны зөвлөлийн дарга Б.Баатарзоригийн суудлыг ганхуулж мэдэхээр болоод байна.
Б.Баатар
Сэтгэгдэл (52)