Хичээлийн шинэ жил эхлээд гурав дахь долоо хоногтоо үргэлжилж байна. Эхний долоо хоногт коронавирусний халдварын улмаас 29 сургууль, цэцэрлэг алсын зайн сургалтад шилжээд буй. Ингэхдээ өвчилсөн хүүхүүдийн дийлэнх нь сургуулийн орчинд биш гэр бүлийн хүрээнд халдвар авсан талаар мэргэжилтнүүд үзэж байна. 

Үүнтэй холбогдуулан хүүхдүүдийг гэрээр биш танхимаар хичээллэх боломжоор хангахыг БШУ-ны сайд Л.Энх-Амгалан хэллээ. Тэрбээр энэ талаар "Бидний гол зорилго "сургууль дахин хаахгүй" байж, хүүхдүүдийнхээ хичээлийн хоцрогдлыг бага ч атугай гүйцэхийн төлөө л байгаа.

Вакцины хоёр дахь тунд 12-17 насны хүүхдүүдийн 90 хувь, багш нарын 86 хувь нь хамрагдаад байна. Нийт халдвар авсан хүүхдүүдийн 70 хувь нь сургууль биш гэр бүлийн орчинд авч байгаа гэсэн судалгаа гарлаа.

Стандартын бус орчинд нэг ч хүүхдийг хичээллүүлэхгүй. Танхимаар хичээллэх өдрүүдийг үе шаттай нэмнэ" гэсэн юм. Одоогоор сургуулийн нэг анги хоёр бүлэг болон таван өдрөөр ээлжлэн танхимаар хичээллэж байгаа юм.

Ташрамд, сүүлийн хоёр хичээлийн жилд дунджаар нийт хугацааны 50 орчим хувийг зайн, теле хичээлээр явуулаад байгаа бөгөөд үүнээс үүдэн 174 гаруй хүүхэд хичээлийн хоцрогдолд ороод буй талаар судалгаа гарсан билээ. Боловсрол, шинжлэх ухааны яамнаас байгуулагдсан ажлын хэсэг тооцоо судалгаанд үндэслэн сурагчдын сурлагын хоцрогдол нөхөх, арилгах /2021-2023 он/ гурван жилийн цогц төлөвлөгөө боловсруулан ажиллаж байгаа юм.

Ер нь сайд Л.Энх-Амгалан болосролын салбарыг хариуцаж ажилласнаас хойш тус салбарт "гэрэл" асаж эхлэх шиг боллоо. Юу гэвэл, тэрбээр яамныхаа ямар ч үүрэггүй хэдэн "амь"-гүй албатуудыг цөөлөхөөр зоригтой алхам хийж ажиллаж байгаа. Түүний цомхотгохоор Төрийн албаны зөвлөлд хүргүүлсэн 30 ажилтан дунд зөвхөн шагнал тодорхойлох үүрэгтэй мэргэжилтэн байсан гэдэг. Тэрбээр энэ тухайгаа "Надад энэ яамны ажил хийдэггүй 30 хүнээс, 30 сайн багш илүү хэрэгтэй. Энэ хэмнэсэн мөнгөөр ядаж тэдний цалинг нэммээр байна" хэмээн тайлбарласан юм. 

А.Сүх