М.Ану охин гурван настай. Тэр мянгад нэг тохиолдол хурууны гажигтай төрсөн. Жаахан л анхаарал сулруулбал хуруу нь идээлж удаан хугацааны эмчилгээ шаардлагатай болдог. Түүнийг өвчин зовууриас салгаж, нэгэн гэр бүлд аз жаргал бэлэглэхэд өөрсдийн хувь нэмрээ оруулахыг уншигч олносооо хүсэж байна.
-Сайн байна уу, Манай уншигчдад өөрийгөө товчхон танилцуулахгүй юу?
-Намайг О.Отгонжаргал гэдэг. Нөхөр гурван хүүхдийн хамт амьдардаг. Гуравдугаар ангид сурдаг нэг охинтой. Гурван настай хоёр ихэр хүүхэдтэй. Ихрүүдийн охиныг М.Ану, хүүг М.Анар гэдэг. Манай нөхөр Гашуунсухайтын боомтоор нүүрс тээвэрлэдэг байсан юм. Гэвч Оюутолгойд коронавирусний халдвар гарсан шалтгаанаар зам нь хаалттай, ажил нь зогсонги байдалтай байна. Одоогоор хувиараа ажил хийж, өрхийн амьжиргаагаа залгуулж байна.
Энэ жил цар тахалтай холбогдуулан зөвхөн 4-5 настнуудыг цэцэрлэгт хамруулж байгаа. Тиймээс ихрүүдээ харах, том охиныхоо хичээлийг хийлгэхийн хажуугаар ихэр охиныхоо эмилчгээний зардлыг бүрдүүлэхээр ээмэг, зүүлт, бугуйвч зэрэг төрөл бүрийн гоёл чимэглэл хийж зарж байна.
-Ихэр охиныхоо тухай ярихгүй юу?
-Манай охин төрөхдөө дутуу хөгжилтэй төрчихсөн юм. Юунаас шалтгаалсан гэдэг нь тодорхойгүй. Эмч нар мянгад нэг төрдөг тохиолдол гэж тайлбарласан. Энэ үе нь л миний охинд тохиолдсон юм болов уу гэж бодож байна.
Хүний арьс том болох тусам дагаад томордог. Улмаар барьцалдаад наалдсан байгаа гар энгийн хүнийх шиг төлжиж чадахгүй, хөгжил нь буурах,үе нь өсөхгүй байх эрсдэлтэй гэсэн. 2-3 насанд хүүхдийн төлжилт хурдан явагддаг учраас хагалгаагаа аль болох хурдан хийлгэвэл буцаад нөхөн сэргээгдэхэд хурдан, боломжийн хугацаа гэж үздэг юм байна лээ.
-Бие нь их өвддөг үү, өөрт нь их зовуурьтай байдаг байх?
-Гар нь наалдацтай учраас байнга цэвэрлэж, арчлахгүй бол үрэвсэх гээд байдаг. Дархлаа нь жаахан буурчихаар идээ татаад эхэлдэг. Гар нь нэг идээлчихвэл удаан хугацаагаар эмчлэгддэг юм. Одоогоор жаахан хүүхэд болохоор гар ийм л байдаг гэж боддог байх. Байнгын асаргаа, сувилгаа шаардлагатай учраас хүүхдээ хараад гэртээ суухаас өөр арга байдаггүй.
-Та гоёл чимэглэл хийж зардаг гэсэн. Хэр их мөнгө цуглуулж чадав?
-Тиймээс охиноо эрүүл болгохын тулд асрахын хажуугаар гоёл чимэглэл хийж, нөхөр бид хоёр одоогоо эмчилгээнийхээ зардлын 10 хувийг олсон байна. Одоогоор хамгийн том зорилго охиноо эрүүл болгох, эрхлээд тоглож наадахыг нь харах чин хүсэл байна. Миний охин том болоод цэцэрлэг, сургуульд яваад эхлэхээр бусад хүүхдүүд гар нь наалдацтай гэж шоолж элэглэж, гадуурхах вий. Ээж, аавдаа намайг эрүүл төрүүлж, өсгөж өгөхгүй яасан юм гэж гомдох вий гэхээс их айдаг юм. Тиймээс ээж хүн ямар байдаг билээ, тэр бүгдийг л хийж байна. Сүүлд эсгий эдлэл хийх аргыг сурсан. Зарах барааныхаа төрлийг нэмэгдүүлэх төлөвлөгөөтэй байна.
-Дэмжиж байгаа хүн хэр их байна вэ. Хүмүүнлэгийн байгууллагад хандаж үзсэн үү?
-Монголчууд нэгнийгээ гэсэн сайхан сэтгэлтэй. Миний ижил хүүхдээ хараад гэртээ суудаг ээж нар, ахмад хүмүүс гээд сэтгэлийн дэм болж, дэмжиж байгаа. Саяхан гэхэд Дархан-Уул аймгаас нэг хүн яриад дүүгээ дэмжээд хүүхдийнх нь эмчилгээний зардалд бага ч болов дэмж болж зүүлт хийлгэе гэсэн. Энэ мэт сайхан сэтгэлтэй хүмүүс холбогдож байгаа.
Түүнчлэн Монголын улаан загалмай нийгэмлэг, Дэлхийн зөн зэрэг тусламжийн байгууллага мөн Гэр бүл, хүүхэд, залуучуудын хөгжлийн төв зэрэг олон газруудад хандсан ч нэг нь ч хариу өгөөгүй. Уг нь бидэнд мөнгө өгөөч гэхээс илүү охиноо эрүүл саруул болгох тэр гарц, боломжийг зааж өгөөч гэж гуйсан юм.
-Хагалгаа нь хэзээ товлогдсон юм бэ?
-Хугацаа заагаагүй. Харин эмчилгээнийхээ төлбөрийг бүрдүүлчих гэсэн. Гаднаас эмч ирж хагалгаа хийх юм. Миний охиныг эрүүл бүтэн хуруутай болоход дэм болоосой гэж сайхан сэтгэлт иргэдээсээ хүсэж байна. Миний бүтээлийг худалдан авсан хүн бүр охины минь эрүүл болох үйлсэд хувь нэмрээ оруулж байгаа юм шүү. Охин минь өвчингүй, эрүүл байх нь манай гэр бүлийн аз жаргал юм.
А.Сүх
Хандивын данс: 5005937316 \Хаан банк, О.Отгонжаргал\
