Ерөнхий сайд Л.Оюун-Эрдэнэ Хятадад айлчлахаар төлөвлөж буй. Уг асуудал өнгөрсөн тавдугаар сард яригдаж байсан ч цар тахлын нөхцөл байдалтай холбоотойгоор одоогоор албан ёсны айлчлал хэзээ гэдэг тов хараахан гараагүй байна. Айлчлалаар өмнө нь ярьж байгаад гацаанд орсон төслүүдийг урагшлуулах асуудлыг ярилцах талаар Ерөнхий сайд Л.Оюун-Эрдэнэ хэлж байсан юм.

Тодруулбал, тэрбээр Хятадад хийх айлчлалын гол зорилго нь “Олон жил гацчихсан байгаа төмөр замыг очиж үзнэ. Өргөн нарийн цариг хэрхэн холбогдох вэ гэдэг асуудал шийдэгдээгүй байгаа.

Бид хэрвээ энэ асуудлуудаа шийдэж чадвал одоо гарч байгаа нүүрсний экспорт нэг дахин нэмэгдэнэ. Цаашлаад бид нүүрсний экспортоо улам сайжруулж, нүүрс угаах ажлыг урагшлуулахаар төлөвлөж байна. Бид байгалийн баялгаа шууд гаргах биш, аль болох нэмүү өртөг шингээхэд анхаарах хэрэгтэй. Үүний тулд олон жил маргасан төмөр замаа холбох хэрэгтэй” хэмээн мэдэгдэж байсан юм.

Түүнчлэн айлчлалын үеэр гол ярих ёстой асуудлын нэг нь нүүрс тээвэр. Саяхан л гэхэд БНХАУ-ын тал Гашуунсухайт-Ганцмод боомтын нүүрс тээврийг дөрөв хоног зогсоож энэ сарын 14-нд эргэн нээжээ. Цар тахлын нөхцөл байдалтай уялдан нийлүүлэлт хязгаарлагдмал байгаатай холбоотойгоор нүүрс тээврийн ихэнх жолоочид сул зогсолттой байна. Жолооч нарын зүгээс Хятадын талаас дарамт их гэж хэлдэг. Тиймээс Ерөнхий сайд Л.Оюун-Эрдэнэ Хятадад айлчлах үедээ дээрх асуудалд дорвитой арга хэмжээ авч гацаад байгаа нүүрс тээврийн эргэлтийг сайжруулах талаар арга зам эрэлхийлэхийг дайя.

Б.Лхам