Ерөнхийлөгч У.Хүроэлсүх Э.Оюунболдын аварга цолыг хурааж түүнд унасан бөхчүүдийн цолыг ахиулж олгохоор болжээ.

2019 оны Улсын их баяр наадмаар Э.Оюунболд болон өсөх идэр чимэг хүртсэн начин Э.Цэрэнтогтох нараас допинг илэрсэн билээ.

Улмаар Э.Оюунболд нэр төрөө сэргээлгэхээр шүүхэд хандсан ч шүүхээс тодорхой шинжилгээний хариуг үндэслэн түүнийг сэргээшийн төрлийн зүйл хэрэглэсэн гэж дүгнэсэн юм. Тодруулбал, Үндэсний их Баяр наадмын зохион байгуулах хороо нь хуульд заасан эрх хэмжээнийхээ хүрээнд 08 дугаар тогтоол гаргаж “Э.Оюунболдын барилдаж давсан даваа бүрийг хүчингүйд тооцох, түүний барилдах эрхийг 2 жилийн хугацаагаар хасах, Э.Оюунболдод өвдөг шороодсон бөхчүүдийн давааг ахиулж, цол, чимгийг олгуулах, Э.Оюунболдод олгосон Монгол Улсын аварга цолыг хураах санал"-ыг Монгол Улсын Ерөнхийлөгчид өргөн мэдүүлсэн нь холбогдох хуульд нийцсэн байна гэсэн шийдвэрийг шүүхээс гаргаж байсан.

Гэвч өмнөх Ерөнхийлөгч Х.Баттулга түүний цол чимгийг хураахгүй байсаар бүрэн эрхийн хугацаа нь дууссан байдаг юм.

А.Сүх