Үндэсний соёл амралтын хүрээлэнд болсон ICT экспоны нээлтийн үеэр олон зуун хүн цуглаж, халдвар хамгааллын дэглэм зөрчсөн нь олны дургүйцлийг төрүүлэв. 

Коронавирусний халдвар хэдийнэ цар тахал болж, Монгол Улс уг цар тахалд өвдөг сөхөрч, төр засаг нь ард иргэдээ хөсөр хаяаад удаж байгаа. Уг өвчний халдвараар хэдэн мянган хүн өвчилж, нас барсан хүний тоо хэдийнэ 1000 гарсан энэ хүнд үед Монгол Улсын Засгийн газар, Харилцаа холбоо, мэдээллийн технологийн газраас Өндөржүүлсэн бэлэн байдлын журмыг зөрчиж, олон зуун хүнийг нэг дор цуглуулж орхив.

Хатуухан хэлэхэд, Монгол Улсын Засгийн газар, тэр дундаа Ерөнхий сайд Л.Оюун-Эрдэнэ өөрөө ард түмнийхээ өөдөөс халдварын вирус шүршчихлээ.

Үнэндээ Монгол Улс цар тахлыг сөрөөд баярлах хэмжээнд хүртлээ цахим үндэстэн болж чадаагүй. Ёстой нөгөө ус үзээгүй байж хормой шуув гэгч болов.      

Угтаа тус арга хэмжээг халдвар хамгааллын дэглэм зөрчих аюултай хэмээн үзэж, НОК-оос зөвшөөрөөгүй байна. Тодруулбал, НОК-оос энэ сарын нэгний өдөр Харилцаа холбоо мэдээллийн технологийн газарт хүргүүлсэн албан бичигт "Цахим үндэстэн-Digital Nation 21" арга хэмжээ зохион байгуулах зөвшөөрөл олгох боломжгүйг мэдэгджээ. 

Гэтэл зохион байгуулагчид нь НОК-ын дээрх шийдвэрийг үл тоож, халдвар хамгааллын дэглэм зөрчиж, ард түмнээ эрсдэлд оруулав. Тиймээс уг ажлыг санаачилж, зохион байгуулсан Ерөнхий сайд Л.Оюун-Эрдэнэ, Харилцаа холбоо, мэдээллийн технологийн газрын дарга Б.Болор-Эрдэнэ нарыг хариуцлагаа хүлээж, огцрохыг олон нийт шаардаж байна. 

Үнэндээ ард түмэн шаардах бус тэд гаргасан алдаа, хийсэн үйлдлээ ухамсарлаад, Ерөнхий сайд асан У.Хүрэлсүхийн сайн жишгийг үргэлжлүүлэн огцрох ёстой. Хөөгдөж явсанаас сайн жишиг тогтоогоод буцах нь улстөрч хүмүүсийн цаашдын замналд хэрэгтэй гэдгийг ч хэлэх хүн олон байна. 

Б.Баатар