Жанлавын Төмөрсайхан (1972-2021)

Эгшиглэн морин хуурын дөрвөлийг үүсгэн байгуулагчдын нэг өнөөгийн Эгшиглэн хамтлагын ахлагч, морин хуурч  Жанлавын Төмөрсайхан маань удтал хүндээр өвчилж  байгаад өнөөдөр 2021 оны есдүгээр сарын 18-нд таалал төгслөө.

Ж.Төмөрсайхан нь Эгшиглэн морин хуурын дөрвөлтэй 1992 онд “Түмэн агтны төвөргөөн“ хэмээх анхны томоохон тайлан тоглолтоо ард түмэндээ толилуулж улмаар 1993 онд ЮНЕСКО-гийн дэргэдэх олон улсын ардын урлагийн байгууллага IOV-ийн урилгаар Германы Вилсхофэн,  Ингольстадт,  Унгарийн Шарвар, Бельгийн Шотэн, Австрийн Крэмс, Италийн Горициа зэрэг хотуудад зохиогдсон фестивалиудад 50 гаруй удаа тоглолт хийж, Монголын ардын урлагийг Европд таниулах, Монгол орноо гадаадад сурталчлах дашрамд Эгшиглэн хамтлагынхаа Европ дахь амжилтын суурийг тавилцсан  юм. 1995 оноос Герман Улсын  “Алба Култур“ хэмээх соёлын менежментийн байгууллагатай  ажиллаж эхэлснээр Ж.Төмөрсайхан нь  хамтлагтайгаа болон бусад гадаад дотоодын төслийн  хүрээнд  өнөөг хүртэл  Европ, Америк,  Африк,  Ази, Скандинавын орнуудын нэр хүндтэй театруудын тайз,  хөгжмийн наадмуудад мэргэжлийн  өндөр түвшинд тоглож, авъяас ур чадвараараа гайхагдаж явсан монголын шилдэг морин хуурчдын нэг байлаа.

Таны хүнлэг нөхөрсөг, дайчин шаргуу, гэгээлэг, шогч хөгжилтэй зан чанар, сайхан инээмсэглэх дүр төрх бид бүхний зүрх сэтгэлд үргэлж орших болно.

Ум сайн амгалан болтугай