Харуулын даргаа буудан хөнөөсөн хэргийн шүүх хурал өнөөдөр 10 цагт Говь-Алтай аймгийн сум дундын эрүүгийн хэргийн анхан шатны шүүхэд эхэллээ.

Эргэн сануулахад энэ оны дөрөвдүгээр сард Говь-Алтай аймгийн Алтай сум дахь хилийн 0214 дүгээр ангид хоёр цэрэг харуулын даргаа буудан хороосон хэрэг гарсан. Тус хэрэгтэй холбогдуулан байлдагч М, Х нарыг баривчилж, хэргийг шалгасан.

Хэргийг тус аймгийн прокурорын газраас Эрүүгийн хуулийн тусгай ангийн 10.1 дүгээр зүйлийн 2.4, 2.9, 2.11, 28.5 дугаар зүйлийн 1, 28.7 дугаар зүйлийн 2, 28.8 дугаар зүйлийн 1, 28.15 дугаар зүйлийн 1, 17.2 дугаар зүйлийн 3.2 дахь хэсэгт зааснаар яллах дүгнэлт үйлдэн тус аймаг дахь Эрүүгийн хэргийн анхан шатны шүүхэд шилжүүлсэн байна.