Баттулгын Баасанцогт өмгөөлөгчийг бүгд мэддэг болсон. Түүний шүүгч нартай наргиж буй болон лифтэн доторх бичлэг задарсны дараа гэрээслэл үлдээн алга болсон гээд. Түүнчлэн нэр бүхий шүүгчдийн данс руу мөнгө шилжүүлсэн, томоохон хэргүүдийн сценарь гаргаж, схем зурсан зэрэг ноцтой баримтууд ил болж олон нийтийг цочирдуулсан үйл явдал өнгөрсөн нэгдүгээр сараас эхлэн ар араасаа гарсан. Хэнд ял өгөх, өгөхгүй талаар хэргийн схем зурж, сүлжээ үүсгэсэн зэргээс нь иргэд түүнийг “Хонгил”-ын өмгөөлөгч гэж нэрийдээд буй.

Тэгвэл өмгөөлөгч Б.Баасанцогттой холбоотой хэргийн эргэн тойронд өнгөрсөн хугацаанд юу болж өнгөрөв.

Түүнтэй хамт наргисан шүүгч Х.Идэр, Д.Отгонбаатар, З.Болдаатар нарыг Шүүхийн ёс зүйн хороогоор хэлэлцэж сахилгын шийтгэл оногдуулсан ч, шүүхээс шийдвэрийг хүчингүй болгож, харин АТГ-ын ажилтан П.Чулуунбаатарыг үүрэгт ажлаас нь чөлөөлөн байдаг. Үүнээс гадна нэр бүхий 11 шүүгчийн данс руу мөнгө шилжүүлсэн байдаг бөгөөд энэ нь олон нийтэд ил болмогц шүүгч нар буцаагаад “Зээлийн эргэн төлөлт” гэсэн утгаар шилжүүлсэн гэдэг.

Тэрбээр 2017 оны есдүгээр сараас 2021 оны нэгдүгээр сарын 27-ныг хүртэлх хугацаанд нэр бүхий 11 шүүгчийн данс руу 47,220,000 төгрөг шилжүүлсэн нь баримтаар нотлогдсон. Мөн  прокурор, цагдаа, АТГ, ТЕГ-ын ажилтнууд руу удаа дараагийн үйлдлээр мөнгө шилжүүлсэн баримтуудыг хуулийн байгууллага илрүүлсэн гэдэг.

Б.Баасанцогтыг АТГ-ын Мөрдөн шалгах хэлтсээс Эрүүгийн хуулийн 12.6.1-т заасан “Бусдыг биеэ үнэлэхэд зуучилсан, татан оролцуулсан”, 22.5.1-т заасан “Өөртөө, бусдад давуу байдал бий болгох зорилгоор бусдад албаны чиг үүрэг, бүрэн эрх, албан тушаалын байдалтай нь холбогдуулан эд зүйл өгсөн” үндэслэлээр шалгаж байгаа юм.

Иргэд дээрх асуудалд хатуу хариуцлага хүлээлгэх ёстой бөгөөд ингэснээр бусдад нь сургамж болно гэж үзэж байгаа юм. Мөн уг асуудлаар зарим гишүүд байр сууриа илэрхийлсэн бөгөөд УИХ-ын гишүүн Ц.Мөнх-Оргил мөн адил хатуу хариуцлага хүлээлгэхгүй бол хэлмэгдүүлэлт хэзээ ч дуусахгүй гэдгийг сануулсан юм.

Б.Лхам