УИХ-ын сонгуулийн 18, 28 дугаар тойрог буюу Хэнтий аймаг, Сонгинохайрхан дүүргийн нөхөн сонгуулийн санал хураалт энэ сарын 10-ны өдөр явагдана. Нөхөн сонгуулийн сурталчилгаа есдүгээр сарын 18-ны өдөр эхэлсэн бөгөөд маргааш албан ёсоор хаагдах хуулийн заалттай. Тэгвэл энэ удаагийн нөхөн сонгуулийн сурталчилгааны өнгө ямар байсныг тоймлон хүргэж байна.

Сонгинохайрхан дүүргийн 28 дугаар тойрогт Монгол ардын намаас Энхбаярын БАТШУГАР, Ардчилсан намаас Эрдэнийн БАТ-ҮҮЛ, Зөв хүн Электорат эвсэл"-ээс Бадрахын НАЙДАЛАА, Үнэн ба Зөв намаас Аюурзанын ОТГОНБААТАР, Иргэний зориг ногоон намаас Шагдарсүрэнгийн ГАНТУЛГА, Эрх чөлөөг хэрэгжүүлэгч намаас Шоовдорын ТӨМӨРСҮХ, Дэлхийн Монголчууд намаас Логийн ЦОГ, Ард түмний олонхийн засаглал намаас Алтанцэцэгийн БАТДОРЖ, Шударга иргэдийн нэгдсэн эвсэл намаас Цэндсүрэнгийн ГАНТУЛГА, Бие даан нэр дэвшигч Хадбаатарын БАТ-ЯЛАЛТ нар өрсөлдөж буй. 

Тэд сонгуулийн сурталчилгаагаа өөр өөрийнхөө өнгөөр явуулж байна. Тухайлбал, Монгол ардын намаас Энхбаярын БАТШУГАР "Улсын хөгжилд хүч нэмье" уриатайгаар сонгуулийн сурталчилгаагаа явуулж, тойргийн сонгогчидтойгоо ээлж дараалан уулзалт хийсэн. Мөн олны танил улстөрчдөөр өөрийгөө магтуулжээ. Сангийн сайд Б.Жавхлан, Хууль зүй, дотоод хэргийн сайд Х.Нямбаатар, Сонгинохайрхан дүүргээс сонгогдсон УИХ-ын гишгүүн Н.Учрал нар түүнийг УИХ-д сонгох учиртай, сайн боловсон хүчин болохыг тодорхойлсон байна.

Сонгинохайрхан дүүргийн 28 дугаар тойрогт Ардчилсан намаас нэр дэвшигч Эрдэнийн Бат-Үүлийн сонгуулийн сурталчилгаа дотроо хагаралдаад байсан нам дээрээ төвлөрсөн гэхэд нэг их хилсдэхгүй биз. Тэрбээр нөхөн сонгуульд "Эв нэгдэлд хөтөлнө" гэх уриатай оролцож буй. Энэ нь хоёр хуваагдаад байсан Ардчилсан намыг эв нэгдэлээ зарлаж, нэг даргатай болно хэмээн мэдэгдэхэд нөлөөлсөн гэдгийг ч хэлэх хүн олон байна. Мөн тэрбээр сонгуулийн сурталчилгаагаа өмнө хийж хэрэгжүүлж байсан ажлаа үргэлжлүүлэхэд анхаарна гэдгээ гол мессежээ болгожээ. Гэр хорооллын дахин төлөвлөлтийг Хотын дарга байхдаа эхлүүлсэн болохыг ч дурдахаа мартсангүй.

Нөхөн сонгуулийн сурталчилгааны бас нэгэн сонирхолтой өнгө нь Үнэн ба зөв намаас нэр дэвшигч Аюурзанын ОТГОНБААТАР байв. Тэрбээр нэр дэвшигчийнхээ үнэмлэхийг гардан авсан даруйдаа л Төв талбай дээр суулт зарлаж, сурталчилгаагаа эхлүүлсэн. Тэрбээр мөнгөгүй сонгууль гэсэн үзэл санааг ялуулахын тулд Сүхбаатарын талбайд суусан гэдгийг онцолсон. "Бид шинэ монгол Улсыг бүтээнэ", "Мөнгөгүй Сонгуулийн үр дүнд л Авилгачгүй улс төр бий болно" гэдгийг уриалсан тэрбээр сонгуулийн сурталчилгааны хугацаанд тухайн тойрогт өрсөлдөж буй нэр дэвшигчдээ ээлж дараалан мэтгэлцээнд дуудаж, гудамжинд тэмцэл хийж, цахим сүлжээгээр шууд лайваар олон нийттэй уулзаж, эсэргүүцлээ илэрхийлж байсан нь мөн л сонирхолтой сурталчилгаа байв. 

Зөв хүн Электорат эвсэл"-ээс нэр дэвшигч Бадрахын НАЙДАЛАА-гийн сонгуулийн сурталчилгаа мөн л сонирхолтой явагдав. УИХ-д суудалтай намаас нэр дэвшиж буй тэрбээр эрх баригчдын хийж хэрэгжүүлж буй ажлыг шүүмжилж, алдаа дутагдлыг нь засах болно гэдгийг сурталчилгааныхаа хугацаанд илэрхийлж байсан. Хүүхдийн мөнгийг хадгаламж хэлбэрт шилжүүлнэ гэдгийг мэдэгдсэн Сангийн сайдын мэдээллийн дараа Б.Найдалаа "Хүүхдийн мөнгийг дарга нар цар тахал намжаагүй байхад хуримтлал нэрээр зогсоох гэж байна. 

Одоо бензин биш шахмал түлшинд хонон өнжин очерлодог боллоо. Чадахгүй юм бол зүгээр нүүрсээ оруулчихаач ээ, хөлдөж үхэлтэй биш" гэдгийг ч хэлж байсан. Тэрбээр шатахууны хомсдол үүссэн өдрүүдэд сонгуулийн сурталчилгаагаа унадаг дугуй, морьтой явж хийсэн нь мөн л сонин сурталчилгаа байв. 

Б.Баатар