ХӨСҮТ-ийн эрчимт эмчилгээний тасаг дээр очиж нөхцөл байдлын талаар УИХ-ын гишүүн С.Одонтуяа мэдээлэл өглөө.

Тэрбээр “УИХ-аар Монгол Улсын 2022 оны нэгдсэн төсөв удахгүй хэлэлцэгдэнэ. Төсөвтэй холбогдуулан эрүүл мэндийн салбарын бэлэн байдал ямар байгаа талаар ялангуяа, ковид-ыг голчлон эмчилж байгаа ХӨСҮТ-ийн нөхцөл байдалтай танилцлаа. Ямар ч бэлтгэл алга байна. Нөхцөл байдал маш хүнд байна.

Сэхээний тасагт орж үзлээ. Тааз нь бараг нурж унахад бэлэн болсон байна.

1986 оноос хойш засварын ажил хийгдээгүй. Нэг өрөөг Хаан банк гээд хоёр өрөөг гуйлгаар тохижуулсан.  Засвар хийгдээгүй, бохир орчинд үйл ажиллагаа явуулж байна. Удахгүй улсын төсөв яригдахад ХӨСҮТ-ийн асуудлыг заавал ярихгүй бол болохгүй нь. Тооцоо судалгааг нь авсан.

Уг нь Сангийн сайд 3.2 тэрбум төгрөгийн санхүүжилтийг шийдэж өгсөн боловч тендер нь өнөөдрийг хүртэл шалгараагүй. ХӨСҮТ-д нэн түрүүнд тулгамдсан асуудал нь цэвэрлэх байгууламж, сантехникийн засварыг хийхгүй бол нурж унахад бэлэн болсон байна. Бид ковид гээд нэлээд мөнгийг Засгийн газарт зарцуулах эрх өгсөн. Гэвч гол газартаа анхаарал хандуулаагүй байна. Мөн бусад эмнэлгүүдэд нөхцөл байдал ийм байж магадгүй байна.

Монгол хүний амь нас нэн чухал.

Эмнэлгийн удирдлагуудаас тулгамдаж байгаа асуудлаа хэрхэн шийдвэрлэж байна гэхээр олон улсын байгууллагад төсөл бичиж өгсөн зэргээр дан гуйлгын зүйл ярьж байна. Улсын төсвөөр энэ асуудлыг шийдэх ёстой. Шаардлагыг холбогдох газар тавина” гэлээ.

А.Сүх