УИХ-ын чуулганы баасан гарагийн чуулганы нэгдсэн хуралдаан эхэллээ. Хуралдааны эхэнд Нүүрс тээвэрлэлтийн салбарт Засгийн газраас авч хэрэгжүүлж буй арга хэмжээний талаар сонсож байна.

Х.Булгантуяа: Цагаан хад боомтыг богино хугацаанд ногоон бүс болгох нь ойлгомжтой. Харин нүүрс тээврийн эргэлтийг нэмэгдүүлэхийн тулд цаашид юу хийх ёстой вэ. Бид хувийн хэвшлийн асуудал гээд хаяж болохгүй. Банкны зээлийн хүүг мэдэхгүй. Банкны асуудал гээд яриад сууж байж болохгүй Л.Халтар сайд аа. Учир нь ард түмэн, монголын эдийн засагт шаардлагатай асуудал.

Нүүрс тээвэрлэгч компаниудад тээвэрлэлтийн үнийг багасгахад цаашид юу хийх шаардлагатай юм бэ гээд асуугаад байна. Гэтэл нүүрс тээврийг дөрөв, тав дахин үнэтэй тээвэрлэнэ үү хамаагүй гээд сууж байж болохгүй байх. Учир нь нүүрс тээврийн зардал манай улсад орж ирэх ашиг орлогоос идэж байгаа хэрэг шүү дээ.

Тиймээс зардлаа бууруулах ёстой.

Цагаан хад боомтыг богино хугацаанд ногоон бүс болголоо гэхэд цаашид терминалаас гадна тээвэрлэлтийн зардлын бууруулахад юу хийх юм.

Л.Халтар: Тээврийн зардлыг бууруулах хамгийн амархан арга бол уул уурхайд нүүрсээ хил нөхцөлөөр худалддаг болох юм. Ингэвэл хүссэн хүсээгүй уурхайгаас хил хүргэх ажлаа өөрсдөө зохион байгуулдаг болно. Үүн дээр уул уурхайд тээврийн компанийн тендер зарлаад явчих ёстой. Ингээд хамгийн бололцоотой үнэтэй, чанартай үйлчилгээг авах юм. Үүнийг нүүрс тээврийн С зөвшөөрөлтэй уяж өгөхөөр УУХҮЯ-тай яриад байгаа юм.

Б.Лхам