Нийт шүүгчийн анхдугаар чуулган өнөөдөр өглөө Төрийн ордонд эхэлсэн. Уг чуулганд Монгол Улсын Ерөнхийлөгч У.Хүрэлсүх оролцож үг хэлсэн юм. Тэрбээр энэ үеэрээ Хотын захиргааны Хангарьд ордонг Улсын дээд шүүхэд өгөх чиглэлийг Засгийн газарт өгсөн талаараа мэдэгдэв.

Тэрбээр "Төрийн тэргүүний хувьд Улсын дээд шүүхийг улсынхаа төв талбайн баруун талд байрлан үйл ажиллагаагаа явуулаасай хэмээн хүсэж байна. Энэ талаар миний бие Засгийн газарт холбогдох чиглэлийг өгсөн. Засгийн газар уг асуудлыг нааштай шийдвэрлэнэ гэдэгт би итгэж байна" хэмээв. 

Ташрамд өгүүлэхэд Нийслэлийн Засаг даргын Тамгын газрыг энэ оны арванхоёрдугаар сарын 31-ний дотор Яармаг дахь шинэ байр руугаа нүүж орох шийдвэрийг Засгийн газар гаргасан. Үүнтэй холбогдуулан "Хангарьд ордон"-г дуудлага худалдаанд оруулж, худалдаалахаар шийдвэрлээд байгаа билээ. Дуудлага худалдааны эхний үнэ нь 43 тэрбум төгрөг гэх мэдээлэл цацагдсан. Тэгвэл эл барилгад Дээд шүүх нүүж орох бололтой. 

Б.Баатар