Өнгөрсөн оны долоодугаар сард Налайх дүүргийн VI хорооны нутаг дэвсгэр, “Тэнгэрийн энерги” бясалгалын төвд бясалгал хийж байсан 25 настай эмэгтэй алга болсон хэрэг гарсан билээ. 

Тэгвэл ор сураггүй алга болсон эмэгтэйн цогцос өчигдөр дөрвөн метрийн гүнтэй нүхнээс олджээ. Тодруулбал, Налайх дүүргийн зургадугаар хороонд "нүхэнд хүний цогцос олдсон, гаргахад тусламж хэрэгтэй байна" гэсэн дуудлагыг дүүргийн цагдаагийн хэлтсээс аравдугаар сарын 11-ний өдрийн 16:45 цагт хүлээн авсан. Тус дүүргийн Эрэн хайх, аврах бүлгийн алба хаагчид 30 км замыг туулан 17:36 цагт очиж дөрвөн метрийн гүнтэй нүхэнд байсан цогцсыг есөн минут ажиллаж гарган тус дүүргийн цагдаагийн хэлтэст хүлээлгэн өгсөн. Тус цогцсыг шинжилж үзэхэд өнгөрсөн 2020 оны долдугаар сард сураггүй болсон 25 настай эмэгтэй О-гийнх болох нь тогтоогджээ. Эл хэргийг мөрдөн шалгах ажиллагаа явагдаж байгаа аж. 

Ташрамд өгүүлэхэд, О нь алга болохдоо шөнө Тэрэлжид байдаг бясалгалын төвөөс харина гээд гарч яваад сураггүй болсон байдаг. Алга болохоосоо өмнө аав руугаа залгаад "Миний утасны цэнэг дууслаа, ирж аваач" гэж утсаар яриад холбоо тасарсан байдаг юм.

Б.Баатар