Хөрөнгө оруулалтын тухай хуульд өөрчлөлт оруулах тухай хуулийн төслийг өнгөрсөн пүрэв гарагийн УИХ-ын чуулганы нэгдсэн хуралдаанаар хэлэлцэж, хуулийн төслийг үзэл баримтлалын хүрээнд хэлэлцэхийг нэгдсэн хуралдаанд оролцсон гишүүдийн 51.9 хувь нь дэмжсэн. Иймд төслийг анхны хэлэлцүүлэгт бэлтгүүлэхээр Эдийн засгийн байнгын хороонд шилжүүлээд байгаа билээ.

Олон нийт уг хуулийн төслийг үндэсний аюулгүй байдалд заналхийлж байна хэмээн үзэж, хуулийн төсөл өргөн барьсан гишүүдийг огцрохыг шаардаж буй.

Ийнхүү иргэдийн эсэргүүцэлтэй тулгарсан гишүүд уг хуулийн төслийг эргүүлэн татах хүсэлтийг УИХ-ын дарга Г.Занданшатарт өргөн барьжээ.

Хуулийн төслийг хамтран өргөн барьсан УИХ-ын гишүүн Д.Өнөрболор уг хүсэлтдээ "Хууль боловсруулах явцад гишүүдийн байр суурь, саналыг нэгтгэх хурал, уулзалтыг зохион байгуулаагүй, УИХ-ын эдийн засгийн байнгын хорооны хурлаар энэ асуудал орж байгааг албан ёсоор мэдэгдээгүй, бодлогын түвшинд миний оролцох боломжийг хангаагүй бөгөөд одоогийн өргөн барьсан төсөлд миний санал тусаагүй болно.

Иймд маргаан дагуулж буй хуулийн төслөөр одоогийн тулгамдаж буй хөрөнгө оруулалтын асуудлыг шийдэх боломжгүй, Хөрөнгө оруулалтын тухай хуулийг бүхэлд нь боловсронгуй болгох зарчмын санал маань тусгагдаагүй учраас тус хуулийн төслийг буцаан татах хүсэлтээ хүргүүлж байна" гэсэн байна.

Харин УИХ-ын гишүүн П.Анужин УИХ-ын даргад хүргүүлсэн хүсэлтдээ "Хөрөнгө оруулалтын тухай хуульд өөрчлөлт оруулах тухай хуулийн төслийг Монгол Улсын гадны хөрөнгө оруулалтыг нэмэгдүүлж, эрх зүйн таатай орчныг сайжруулах, үзэл баримтлалын хүрээнд дэмжин, санаачлахад нэгдсэн. Гэтэл хуулийн үзэл баримтлалд санаачлагчдын ярилцаж тохиролцсоноос өөр агуулга байгаа тул хуулийн төслийг татан авах саналыг хүргүүлж байна" гэжээ. 

Мөн тэрбээр хууль санаачлагчдийн олонхийн саналаар төсөл эргүүлэн татагддаг тул бусад гишүүдийн саналыг харах үлдлээ гэдгийг ч онцолсон байна. 

Уг нь дээрх гишүүд тус хуулийн төслийг өргөн барихад гарын үсэг зурж баталгаажуулсан байх ч ийнхүү өргөн барьсан төслөө эргүүлэн татах хүсэлт хүргүүлэв. 

Б.Баатар