Тээвэрчдийн зөвлөл жагсаж байгаа гэж байгаа боловч энэ жагсаалын ард "Страто" компани байх магадлалтай байна. Саяхан ЗТЯ-наас шалгалт хийгээд "Страто"-гийн тээврийг түр зогсоогоод байгаа.

Үүнд эгдүүцсэн "Страто"-гийнхон тээвэрчдээр түрий барьж ЛХалтар сайдын эсрэг, Засгийн газрын эсрэг жагсаж байна.

Тодруулбал, “Эрдэнэс Тавантолгой” ХК-ийн коксжих нүүрсний ордоос Говьсүмбэр аймагт байрлах баяжуулах үйлдвэр рүү нүүрс тээвэрлэх зорилгоор “Страто” ХХК нь туслан гүйцэтгэгч “Илч майн ” ХХК-иар Өмнөговь аймгийн Цогтцэций сумын нутгаар дамжуулан сайжруулсан шороон зам тавихдаа хууль бусаар түгээмэл тархацтай ашигт малтмал ашиглаж байсныг шалгалтаар илрүүлж үйл ажиллагааг нь зогсоосон байдаг.

Түгээмэл тархацтай ашигт малтмал гэдэгт зам, барилгын материалын зориулалтаар ашиглах боломжтой, элбэг тархалт бүхий элс, хайрга, тоосгоны шавар, хүрмэн, боржин, дайрганы зориулалттай барилгын чулууны хуримтлалыг хамааруулсан байдаг байна. Ингэхдээ хайгуулын болон ашиглалтын тусгай зөвшөөрлийг Монгол Улсын хууль тогтоомжийн дагуу байгуулагдан үйл ажиллагаа явуулж байгаа, Монгол Улсад бүртгэлтэй хуулийн этгээдэд олгодог юм.

Харин "Страто" компани бол Монгол, Хятадын хамтарсан байгууллага.

Тухайлбал, тус компани анх байгуулагдахдаа 5990769 регистрийн дугаар бүхий А.Баттүшигийн 100 хувийн эзэмшилд байснаа гурван жилийн дараа буюу 2018 онд хоёр удаа өөрчлөлт орж А.Баттүшгийн эзэмшилд 37 хувь, Г.Эрдэнэбилэгийн эзэмшилд 10 хувь, Э.Сэржмядагийн эзэмшилд 3 хувь, БНХАУ-ын "Шаньдун Шенхан Жиеэ" компани 50 хувийг нь эзэмших болжээ.

Ташрамд, "Страто" компанийн үүсгэн байгуулагч А.Баттүшиг нь ЕТГ-ын дарга асан З.Энхболдын төрсөн дүү З.Хишигтогтохтой 2017 оны дөрөвдүгээр сарын 20-нд "Браунрок" компанийг хамтран үүсгэн байгуулж байжээ. Энэ утгаар З.Энхболд "Страто" компанитай холбогддог бөгөөд тээвэрчдийн гэх тодотголтой жагсаалын ард тус компани жагсаж байх магадлалтай байгаа юм.

А.Сүх