Нийслэлийн ИТХ-ын Тэргүүлэгчид хуралдаж, “Хөгжлийн үүд” төслийн техник эдийн засгийн үндэслэл, барилгажилтын төслийг батлах тухай тогтоолын төслийг хэлэлцэн баталлаа. Ингэснээр нийслэлийн Налайх дүүргийн Хонхор орчимд “Хөгжлийн үүд”, баруун хэсэгт “Морингийн даваа” орчимд шинэ суурьшлын бүсийг байгуулах юм. Дэлгэрүүлбэл, Баянзүрх дүүргийн 11 дүгээр хороо, Налайх дүүргийн 3, 7 дугаар хорооны нутаг дэвсгэр Хонхор орчимд “Хөгжлийн үүд” төслийн хүрээнд 4725 өрх байнга оршин суух орчин бүрдэнэ.

Энэ хүрээнд нийт 6400 ажлын байр бий болох бөгөөд аялал жуулчлал, худалдаа үйлчилгээ, жижиг дунд үйлдвэрлэл хөгжсөн бүс болгон хөгжүүлэхээр төлөвлөжээ. Харин “Морингийн даваа орчимд 5325 өрх оршин суух шинэ суурьшлын бүсийг бий болгоно. Нийт 2010 хүүхдийн суудалтай зургаан сургууль, 4080 хүүхдийн зургаан цэцэрлэг, 490 ортой эмнэлэг энэ бүсэд тусгажээ. Суурьшлын бүсийн төслийг 2021-2025, 2026-2030, 2031-2040 он гэсэн үе шаттайгаар хэрэгжүүлэх гэнэ. Энэ ажилд нийслэлийн төсвөөс 212 тэрбум төгрөг, хувийн хэвшлээс 873 тэрбум төгрөгийн хөрөнгө оруулалт хийгдэх аж. Энэ төсөл хэрэгжвэл ажлын байр нэмэгдэх сайн талтай. Мөн нийслэлийн авто замын ачаалал буурна гэж мэргэжилтнүүд үзэж байна. 

Б.Жаргал