АТГ-ын дэд дарга Г.Азжаргалаас зарим зүйлийг тодрууллаа.

-Саяхан Олон улсын эрэн сурвалжлах сэтгүүлчдийн консорциумын шинжлэн судалсан “Пандора баримт”-д Монголын хоёр улстөрчийн тухай баримтыг дэлгэсэн. Уг асуудалд АТГ-аас шалгалт явуулж байгаа юу?

-АТГ нийтэд ил гарч байгаа мэдээллүүдийг шүүж судалж үздэг. Шаардлагатай гэж үзвэл хэрэг бүртгэлтийн хэрэг нээдэг юм. Зарим нэг хэрэг дээр хэрэг нээгээд явж байгаа. Оффшор гэдэг бол татвараас зайлсхийдэг, татвар бага төлөхийн тулд очдог газар.

Албан тушаалтнууд оффшор бүсэд хөрөнгөө байршуулах, нуугдах, өөр хүний нэр дээр байршуулах асуудал гарч байгаа.

Мөн оффшор бүсэд нээсэн компанийн мөнгөн хөрөнгө нь тухайн газар байдаггүй. Бүртгэл нь байгаад байдаг. Мөнгө нь бусад санхүүгийн зах зээл хөгжсөн Хонгконг, Сингапур, Швейцарь зэрэг газруудад байж байдаг юм. Түүнийг нь мөрдөн шалгах, мөн эх үүсвэр нь хээл хахуулиас олсон байна гэдгийг тогтоож байж гэмт хэрэг болдог.

-Ер нь бол шалгалтын ажиллагаа явуулж байгаа юм байна гэж хэлж болох уу?

-Тийм.

-УИХ-ын нэр бүхий гишүүдийг АТГ-аас шалгаж байгаа гэдэг мэдээллүүд гараад одоогоор намжсан байдалтай байна. Энэ асуудал юу болсон бэ?

-УИХ-ын гишүүдтэй хэрэг явж байгаа. Тухайн хүний хэрэг ийм шатанд явж байна гэж хэлэх боломжгүй байна.

-УИХ-ын гишүүнээр сонгогдсон хэчнээн гишүүнийг шалгаж байгаа вэ?

-АТГ 2007 оноос хойш 5791 хэрэг дээр мөрдөн шалгах ажиллагаа явуулсан байна. Үүнээс 1200 гаруйд нь яллах дүгнэлт үйлдэн холбогдох байгууллага руу шилжүүлсний 497 хэрэг нь шүүхээр шийдвэрлэсэн. Эдгээрээс 10 хувь нь улс төрд нөлөө бүхий этгээд буюу улстөрчид байсан гэсэн судалгаа гарсан.

-Авлига, албан тушаалын гэмт хэрэг нэмэгдэж байгаа үзүүлэлт гарсан байна. Үүн дээр АТГ хэрхэн ажиллаж байгаа вэ. Хэчнээн хэргийг нь шүүхээр шийдүүлсэн бэ?

-Авлига, албан тушаалын гэмт хэрэг нэмэгдэж байгаа гэдэг нь нэг талдаа сайн. Далд үйлдэгддэг байсан хэрэг ил болж байна гэсэн үг. Иргэд өөрсдөө барьж өгдөг, цахим сүлжээгээр гаргадаг боллоо. Дээр нь АТГ өөрөө илрүүлж байна. Учир нь уг төрлийн гэмт хэрэг хулгай, хүн амины хэрэг шиг дуудлагаар ирдэггүй юм. Иргэний гомдлоор ч юм уу, нууц далд аргаар илрүүлдэг. Дээр нь хохирол нөхөн төлүүлэлт ихэссэн. Хохирол нөхөн төлүүлэлт гэдэг буцаагаад тухайн гэмт хэргээс хээл хахууль авсан албан тушаалтны хээл хахуулийг улсын төсөв эсвэл хохирсон төрийн өмчит компанийн дансанд нь хийсэн гэсэн үг.

Б.Лхам