“Бүрэн Монгол” сангийн нээлтийн ёслолд МҮБХ-ны тэргүүн, улсын заан Ц.Магалжав оролцож, үг хэлснийг хүргэе.

-Өнөө цагийн нийгмийн уур амьсгал ийм юм уу, залуус бүхий л зүйл дээр талцаж, хуваагддаг болсон байна. Энэ байдал монголчууд лав сайн зүйл авчирахгүй. Үүнийг арилгах хэрэгтэй. Бид цөөн хүн амтай улсын иргэд. Талцаж болохгүй юм. П.Бүрэнтөгс аварга маань нутаг ус, хөгшин залуу гэхгүйгээр эвийг эрхэмлэе гэсэн уриалга дэвшүүлсэн нь зөв зүйтэй юм. Монголын үндэсний бөхийн холбоо энэ уриалгыг бүрэн дүүрэн дэмжиж ажиллана. МҮБХ маань талцлаас болж, хурлаа зохион байгуулж чадахгүй байдалтай олон жил явж ирсэн.

Бөхчүүд маань одоо ойлгосон. Бид нэг чиглэлтэй явж байгаа. Дараагийн зүйл нь “Бүрэн Монгол” сангийн тэргүүлэгч гишүүний хэлсэнчлэн өв соёл чухал. Монгол өв соёл, Монгол наадам гэдэг зүйл байхгүй бол Монгол Улс бусдаар ялгарч чадахгүй. Өв соёлыг ирээдүй хойч үедээ сурталчлан таниулая гэсэн энэ сангийн дэвшүүлсэн зорилт туйлын зөв байна. Засаг, төр ч үүн дээр нэгийг бодох хэрэгтэй. Захиалгатай, захиалгагүй нь хамаагүй хэдэн залуус нийлж жагсангуут наадмаа хийхгүй гэнэ. Тэгснээ аймаг, сумын наадмыг хийхгүй, улсын баяр наадмыг зохион байгуулна гээд бүх хүнийг бэлдүүлчихээд болилоо гэдэг шийдвэр гаргаж болохгүй.

Энэ тусдаа нэг асуудал. “Бүрэн Монгол” сангаас залуучуудаа дэмжье гэнэ. Энэ зөвхөн ганц хоёр байгууллагын хийх ажил биш. Улс даяараа нэгдэх хэрэгтэй. Дэмжих хэрэгтэй. Энэ төсөл хэрэгжихийн гол агуулга нь монгол хүнийг хөдөлмөрч байлгахыг уриалж байна. МҮБХ бол үндэсний хэмжээний спортын холбоо юм. “Бүрэн Монгол” сангийн 21 аймаг болон Улаанбаатар даяар хэрэгжүүлэх төсөлд МҮБХ дэмжиж ажиллах болно.

Б.Жаргал