Монгол Улсын 2022 оны төсвийн тухай хуулийн төсөлд Засгийн газрын бүтцэд Эдийн засаг, хөгжлийн яам, Цахим хөгжил, харилцаа холбооны яамыг байгуулах төсвийг тусгасан. Уг асуудлаар УИХ-аар хэлэлцэж байна. Энэ үеэр гишүүдийн хэлсэн үг, асуусан асуултыг онцлон хүргэе.

Т.Аюурсайхан: Энэ хуулийн төсөл яагаа ч үгүй байна. Ер нь чадахгүй юм байж албан тушаалд яасан дуртай болчихсон юм. Ажлаа хийж чадахгүй хүмүүсийг чөлөөлөөд явмаар байна. Тэр хариуцлага тооцох хүмүүст нь тооцооч. Амьдрал, улс орныхоо нөхцөл байдлыг мэдэхгүй. Хоёр яам байгуулна гэдэг дутуу боловсруулсан төсөл байна. Гурав, дөрөвхөн чиг үүрэг хэрэгжүүлэх гэж яам байгуулж яах юм.

Ц.Нямдорж: Хариуцлагын асуудлын тухайд Засгийн газрын түвшинд Ерөнхий сайдын бүрэн эрх байдаг. Сайд нартай холбоотой шүүмжлэл нэг талаас гарахаас өөр аргагүй. ЗГХЭГ-ын даргын хувьд Засгийн газрын ажлын аппарат. Ерөнхий сайд, шадар сайдын урдуур орж захираад байж болохгүй. Тэгвэл хоёр, гурван Ерөнхий сайдтай болчихно. Гэхдээ хүндэрсэн үед зохицуулаад явж байгаа.

Миний ямар шийдвэр гаргаж, хэрхэн ажиллаж байгаа нь харагдахгүй байгаа учраас ингэж хэлж байж магадгүй.

Тээвэрчдийн асуудлыг өчигдөр шийдсэн. Түлшний асуудлыг би хариуцан ажиллаж байгаа. Их хүндэрсэн үед орж ажиллана уу гэхээс сайд нарын ажил руу ороод юм бүрийг удирдаж болохгүй. Залуу сайд нар сайжрах хүртэл хугацаа хэрэгтэй байх. Сайжраад явах байх гэж найдаж байна. Иргэдийн шүүмжлэл ч буруу биш. Гэхдээ өмнөх Засгийн газрууд энэ Засгийн газар шиг хүнд нөхцөлд ажиллаж байгаагүй. Тиймээс залуу сайд нар самгардах явдал их байгааг үгүйсгэхгүй. 

Т.Аюурсайхан: Зөвхөн сайд биш дунд шатны ажил хариуцаж байгаа хүмүүсийг хариуцлагажуулах цаг нь болсон байна. Яам байгуулах асуудлыг маш сайн судлах шаардлагатай. Тэгэхгүй бол яам байгуулснаар эдийн засаг хөгжих гэж байгаа юм шиг зөвхөн харагдах байдал дээрээ анхаараад байна. Ажил хийж байгаа юм шиг харагдахын төлөө хандмааргүй байна. 

А.Сүх