УИХ-ын чуулганы үдээс хойшхи “Төрөөс мөнгөний бодлогын талаар 2022 онд баримтлах үндсэн чиглэл батлах тухай” Улсын Их Хурлын тогтоолын төслийг хэлэлцэж байна.
Хуулийн төслийн товч танилцуугын талаар Монголбанкны ерөнхийлөгч Б.Лхагвасүрэн “Ирэх онд Монголбанкны зүгээс бусад байгууллагатай хамтран хэрэгжүүлэх хэд хэдэн ажлыг төлөвлөж, үндсэн чиглэлийг батлах УИХ-ын тогтоолын төсөлд тусгалаа. Цар тахлын үеийн эдийн засгийн хүндрэл, эдийн засгийн өсөлтийн хүртээмжийг нэмэгдүүлэх нь чухал ач холбогдолтой. Цар тахлын хямралд нийгмийн эмзэг бүлгүүд илүү өртөж, ажилгүйдлийн түвшин нэмэгдэж байгаа нь улс орнуудын өмнө тулгарах нэн тэргүүний сорилт болж байна. Иймээс иргэдийн амьдралын чанарыг сайжруулахад шаардлагатай дунд, урт хугацааны тогтвортой хөгжлийн зорилт, эдийн засгийн сэргэлтийг дэмжих, цаашид төрийн болон хувийн хэвшлийн хөрөнгө оруулалтын бодлоготой уялдуулахаар төсөлд оруулсан болно.
Дэлхий нийтээр улс орон бүр уур амьсгалын өөрчлөлтийн эсрэг аянд өөр өөрийн хувь нэмрийг оруулахаар хамтын ажиллагааг өрнүүлж байна. Уур амьсгалын асуудал нь манай улсын хувьд ч хойшлуулшгүй чухал асуудал болсон нь бидний хийж байгаа судалгаанаас харагдаж байна.
Тухайлбал, Монгол Улсын жилийн дундаж химийн агаарын дулаарал дэлхийн дунджаас хоёр дахин өндөр, газрын хөрсний доройтол, эко системийн тэнцвэргүй байдал нэмэгдэж буй байдал нь иргэдийн амьдралын чанарт эрсдэл дагуулахаар байна. Иймд уур амьсгалын өөрчлөлтөд дасан зохицох, тэсвэрлэх чадварыг нэмэгдүүлэх, эко системд ээлтэй шилжилтийг эрчимжүүлэх, дунд болон урт хугацааг харсан бодлого зохицуулалтыг улс орны хэмжээнд нэгтгэн тодорхойлох, хэрэгжилтийг хангахад бодлогын дэмжлэг нэн чухал байна. Энэ хүрээнд Монголбанк уур амьсгалын өөрчлөлтийн нөлөөллийг судлах, ногоон тогтвортой санхүүжилтийн тогтолцоог хөгжүүлэхэд олон улсын байгууллага, төр хувийн хэвшлийн байгууллагатай хамтран ажиллаж Мөнгийн бодлого, санхүүгийн зохицуулалтын арга хэрэгслүүдийг ашиглан дэмжиж ажиллана.
Монгол Улсын эдийн засгийн төрөлжилт, салбарын тогтвортой хөгжлийг ханагахад макро эдийн засгийн тогтвортой байдал нэн чухал болох нь харагдаж байна. Энэ хүрээнд уул уурхайн бус салбарын экспортыг нэмэгдүүлж, дэлхийн өртгийн сүлжээнд холбох асуудлыг хойш тавилгүйгээр дунд, урт хугацааг холбосон бодлогыг хэрэгжүүлж эхлэх шаардлагатай байна.
Энэ бодлогыг амжилттай хэрэгжүүлэхийн тулд өнгөрснөөсөө сургамж авч, ирээдүйг харан төрийн бодлогын уялдааг хангаж, зохион байгуулалтын нэгдмэл байдлыг хэрэгжүүлж ажиллахад Монголбанк өөрийн зүгээс хийх шаардлагатай бүхий л арга хэмжээг хэрэгжүүлнэ.
Цар тахлын нөлөөнд өнгөрсөн хугацаанд огцом агшсан эдийн засаг энэ онд сэргэж байгаа ч өсөлтийн цаашдын төлөв, эдийн засгийн салбар хооронд харилцан адилгүй эмзэг хэлбэрээр үргэлжлэхээр байна. Гадаад орчин сайжирч, экспортын бүтээгдэхүүний үнэ өндөр түвшинд хадгалагдаж байгаа хэдий ч вирусний тархалтыг бууруулах, экспорт тээвэрлэлтийн асуудлыг шийдэхгүйгээр худалдааны түнш орнуудтай нягт хамтын ажиллагааг өрнүүлэх боломжгүй. Үүний үр ашгийг хүртэх нь ч хязгаарлагдмал байгаа нь харагдаж байна.
Цар тахлын нийгэм, эдийн засагт үзүүлж буй нөлөө урьд өмнө тохиолдож байгаагүй том хэмжээтэй байгаагийн дээр олон удаагийн давалгаагаар үргэлжилж болзошгүй байгааг эрсдэлийн удирдлагын хүрээнд анхаарч үзэх шаардлагатай байна. Цаашид ковид-19 цар тахлын нөлөөгөөр эдийн засагт бий болон сөрөг нөлөөг бууруулахын зэрэгцээ үүсэж болзошгүй эрсдэлээс сэргийлэх, эдийн засгийн сэргэлтийг удаашруулахгүйгээр макро эдийн засаг, ажил эрхлэлтийг хэвийн түвшинд хүргэх, нийгмийн хамгааллын тогтолцоог төгөлдөржүүлэх замаар эдийн засгийн өсөлтийн хүртээмжийг нэмэгдүүлэхэд макро эдийн засгийн бодлогуудыг чиглэх нь чухал байна” гэлээ.
А.Сүх
