Сонгинохайрхан дүүргийн Өнөр бүсийн 15-р хороонд байрлах 110-р цэцэрлэгийн өргөтгөлийн шав тавих ёслол боллоо. Тус цэцэрлэг 280 хүүхэд хүлээж авах хүчин чадалтай бөгөөд тойргийн хүүхдүүдийн 80 гаруй хувийг хүлээн авдаг юм. Тиймээс Боловсрол шинжлэх ухааны яамны хэрэгжүүлж байгаа “Эдийн засгийн хүндрэлтэй үед боловсролын чанарыг сайжруулах төсөл”-ийн хүрээнд Азийн хөгжлийн банкны санхүүжилтээр 150 хүүхдийн хүчин чадалтай өргөтгөлийг барих юм байна.
Энэхүү цэцэрлэгийн өргөтгөл ашиглалтад орсноор тухайн бүсийн бага насны хүүхдүүд 100 хувь хамрагдах боломж бүрдэх юм. Тус цэцэрлэгийн өргөтгөл ирэх оны арванхоёрдугаар сард бүрэн ашиглалтад орно. Барилга угсралт гүйцэтгэгч компаниар “Зорь бүтээ” ХХК хариуцсан ажиллаж байна. Шав тавих үйл ажиллагаанд НИТХ-ын төлөөлөгч Г.Төгөлдөр, М.Говьсайхан, дүүргийн төлөөлөгч Б.Баттулга, тус хорооны Засаг дарга О.Оюунцэцэг болон 110-р цэцэрлэгийн төлөөллүүд оролцлоо.
