Ирэх оны Төсвийн тухай хуулийн Соёлын сайдын багцад “Богд Зонхова” бурханы хөшөөг барихад зориулан 32 тэрбум төгрөгийг тусгасан. Энэ нь өнгөрсөн амралтын өдрүүдээр нийгмийн сүлжээнд ихээхэн маргаан дагуулсан юм. Гэтэл Соёлын сайд Ч.Номин өөрийн сошиал хуудсаараа дамжуулан өнөөдөр дараах мэдээллийг хийжээ. Тэрбээр, “Түүх, шашны соёлыг дэлгэрүүлэх "Богд Зонхова" цогцолборын төсөл намайг Соёлын сайдаар томилогдохоос өмнө эхэлсэн төсөл юм.

Анх Соёлын яам энэ цогцолборыг барих, эхлүүлэх санаачилга гаргаагүй, өнгөрсөн хугацаанд энэ төсөлд нэг ч төгрөг зарцуулаагүй болно.

Энэ хөрөнгө оруулалтыг цаг үеэ олоогүй гэж үзэж байгаа учраас Соёлын сайдын хувьд “Богд зонхова” цогцолборын төсөлд хөрөнгө зарцуулахгүй болохоо үүгээр мэдэгдэж байна.

Монгол Улсын хувьд түүх, соёл, шашин нь бидний оршин тогтнохтой холбоотой асуудал. Гэвч, аль ч шашинд сүсэглэх, шүтэх нь аливаа цогцолборыг барих, болихоос үл шалтгаалах дотоод итгэл үнэмшлийн асуудал тул эвийг эрхэмлэхийг Та бүхнээс хичээнгүйлэн хүсье” гэсэн байв.

Ч.Номин сайдын өөрийн хуудсаараа дамжуулан хийсэн энэ мэдээллийг хийснээрээ УИХ-ын дээр өөрийгөө аваачлаа. Богд Зонховагийн хөшөөнд зориулсан 32 тэрбум зөв бурууг энд орхиод ярихад Монгол Улсын төсөв бол УИХ-аар баталдаг хууль. Гэтэл Соёлын сайд “Энэ хөрөнгө оруулалтыг цаг үеэ олоогүй гэж үзэж байгаа учраас Соёлын сайдын хувьд “Богд зонхова” цогцолборын төсөлд хөрөнгө зарцуулахгүй болохоо үүгээр мэдэгдэж байна” гэснээрээ Монгол Улсын хуулийг зөрчинө гэдгээ мэдэгдлээ гэсэн үг юм. Монгол Улс бол парламентын бүгд найрамдах улс. Монгол Улсын Их Хурлын баталсан хуулийн доор хэнбугай нь ч сайд болсон ажиллах ёстой. Түүнээс биш, олон нийт шүүмжиллээ гээд хэн нэгэн сайд нь УИХ-ын баталсан хуулийг зөрчих тухай амны зоргоор яриад байдаггүй билээ. Үнэхээр энэ мөнгийг зарцуулахгүй гэж байгаа бол эхлээд Засгийн газар дээрээ ярилцаад, Төсвийн тодотголоор оруулж ирдэг дүрэм журамтай юм.

Б.Жаргал