Манай улсын спортын салбарын олимпын топ төрлүүдийн нэг нь бокс. Хүн төрөлхтөний эв нэгдлийн бэлгэдэл олимпын наадмаас энэ төрлөөр У.Бадар-Ууган алт, П.Сэрдамба, Н.Төгсцогт нар мөнгө, Н.Энхбат, Н.Баярсайхан, У.Мөнх-Эрдэнэ, Д.Отгондалай нар хүрэл медаль хүртэж байсан. Тив, дэлхийн аваргад боксоор маш олон медалийг манай баг тамирчид авчирч байсан бөгөөд ер нь л спортын хорхойтнуудын найдвар тавьдаг төрөл яах аргагүй бокс. Тэр хэрээрээ энэ төрлийн тамирчид, дасгалжуулагчид спортын хорхойтнуудын анхаарлын төвд байдаг юм.
Харамсалтай нь, манай улсын боксын шигшээ багийн амжилт сүүлийн жилүүдэд буурсан. Тодруулбал, энэ жилийн “Токио-2020” зуны олимпийн наадмаас боксын шигшээ багийнхан ганзага хоосон ирсэн. Хоёр жил тутамд болдог насанд хүрэгчдийн Дэлхийн аварга шалгаруулах тэмцээнээс өнгөрсөн сард мөн л медаль хүртэж чадаагүй. Уг нь боксчдын хувьд олимп, ДАШТ болсон 2021 он чухал мөчлөг байв. Харамсалтай нь элдэв хэл аманд өртөхөөс өөрөөр манай улсын боксын шигшээ багийн тамирчид амжилт үзүүлж чадсангүй. Үүний гол шалтгаануудын нэг нь шигшээ багийн ахлах дасгалжуулагч Ж.Энхтөрийн ажлын хариуцлага, ур чадвартай шууд холбогдоно. Шигшээ багийн ахлах дасгалжуулагчтай хариуцлага тооцох механизм нь мэдээж түүнийг албан тушаалаас нь чөлөөлөх. Олимп, ДАШТ-ээс медалгүй ирсэн, дотоод зөрчил ихтэй байгаа нь дээр хэлсэнчлэн ахлах дасгалжуулагч Ж.Энхтөрийн ур чадварын илрэл бөгөөд энэ ч утгаараа түүнийг шинэ оноос өмнө чөлөөлөх тухай яриа Монголын боксын шигшээ багийн хүрээнд яригдаж эхэлжээ.
Шигшээ багийн шинэ дасгалжуулагчийн сураг ч сонсогдож эхэлсэн бөгөөд тэр хүн нь гавьяат дасгалжуулагч Д.Ганзориг байх нь ээ. Д.Ганзориг багшийн хувьд өмнө нь боксын шигшээ багийг удирдаж байсан. Түүний гарын шавь Э.Бадар-Ууган, П.Сэрдамба нар “Бээжин-2008” зуны олимпын наадмаас алт, мөнгөн медаль хүртэж байв.
Мөн түүнийг шигшээ багийн ахлах дасгалжуулагч байсан он жилүүдэд “Лондон-2012” зуны олимпын наадмаас Н.Төгсцогт мөнгө, У.Мөнх-Эрдэнэ хүрэл медаль хүртэж байсан юм. Тамирчдын амжилтаас багшийг дүгнэдэг өнцгөөр бол тэрбээр гарцаагүй сайн багш. Ардын багш Д.Бандийн дараа төрөн гарсан жинхэнэ ахлах дасгалжуулагч тэр байлаа гэхэд буруутах зүйлгүй.
Гэхдээ түүний нэрийг дагалддаг нэгэн сүүдэр байдаг. Тэр нь тамирчдаа ялгаварлан гадуурхдаг, амжилтаар нь эрэмбэлдэггүй гэх яриа байв. Нуулгүй хэлэхэд, 2013 оны боксын насанд хүрэгчдийн ДАШТ-д гавьяат тамирчин У.Мөнх-Эрдэнийн оронд өөрийн гарын шавь З.Энхзориг агсныг явуулахаар завдсан нь түүнийг шигшээ багийн ахлах дасгалжуулагчаас чөлөөлөх үндэслэл болсон.
Ахлах дасгалжуулагч Д.Ганзориг гавьяат тамирчин У.Мөнх-Эрдэнийг гадуурхсан гэх асуудлаас болж, тухайн үеийн Соёл, спорт, аялал жуулчлалын сайд Ц.Оюунгэрэлээр тойрохоо зуруулсан. Д.Ганзориг багш энэ явдлаас хойш нам гүм явж ирсэн. Харин боксын шигшээ багийн тааруу амжилтууд түүнийг ахлах дасгалжуулагчийн албанд дахин авчирч магадгүй болоод байна. Түүнийг шигшээ багт эргэн томилохоор шавь нар нь хөөцөлдөж эхэлжээ. Монголын боксын хүрээнд нөлөө ихтэй шавь нар нь түүнийг ахлах дасгалжуулагч болгож дөнгөх биз ээ. Магадгүй, боксынхонд хамгийн их дутагдаад буй дэг журам, сахилга батыг гагцхүү тэр л олгож чадаж ч байж мэдэх юм.
Б.Жаргал
Сэтгэгдэл (4)