Мэргэжлийн сүмо бөхийн Кюүшюү башёд уналгүй түрүүлж, японы Эзэн хааны цомын зургаа дахиа хүртсэн 73 дахь ёкозүна Тэрүнофүжигийн NHK телевизэд өгсөн ярилцлагыг хүргэж байна.

-Дээд зиндаанд зургаан удаа хоёр дараалан түрүүлсэн танд баяр хүргэе?

-Баярлалаа.

-Та дөрвөн зүгт мэндчилж ёсоллоо. Юу бодож мэндчилсэн бэ?

-Кюүшюүд удаан хугацаанд тэмцээн болоогүй. Кюүшюү башёд талархалтайгаар эхлүүлсэн.

-Кюүшюү нутгийн иргэд таны барилдааныг талархалтайгаар хүлээн авч үзлээ?

-Тийм ээ. Олон хөгжөөн дэмжигчийг дэмжлэгийн тусламжтайгаар сэтгэл зүйгээ өөдрөг байлгаж, барилдаан улам итгэлтэй болж байсан.

-Та анх удаа уналгүй түрүүллээ. Ямар мэдрэмж төрж байна?

-Одоог хүртэл чадаагүй амжилт байсан. Биелүүлж чадсандаа маш их баяртай байна.

-Сүүлийн өдрийн барилдаанд сэтгэл зүйн хувьд дарамт байв уу?

-Дарамт мэдрээд ямар ч үр дүн гарахгүй. Дэвжээн дээр гарсан л бол байгаа зүйлээ дайчлан барилдах нь чухал гэдгийг бодож байлаа.

-Озеки Такакейшог тосож барилдлаа шүү дээ?

-Би өөрийгөө авьяастай бөх биш гэж боддог. Хамгийн гол нь нэг зүйл дээр л төвлөрч барилдсан.

-Нэг зүйл гэдэг нь?

-Хамгийн гол нь том биеэ ашиглаж, Өрсөлдөгч бөхтэйгөө голлож, дайралтыг нь тогтоож барилдах ёстой байсан. Тийм л мэдрэмжээр барилдаж байгаа.

-Энэ башёг бүхэлд нь эргэн харвал юу гэж бодож байна вэ?

-Мэргэжлийн сүмод орсон цагаас ийм бэлтгэл сургуулилт, барилдаан үзүүлье гэж туршиж байсан боловч хэрэгжүүлж чадаагүй. Бага багаар барилдаанаа өөрийн болгож байна.

-Та уг нь сайн барилдаан гаргасан шүү дээ. Гэхдээ бага багаар гаргасан гэж бодож байна уу?

-Хамгийн гол нь 100 хувь өөрийн болгох зорилготой байгаа.

-Хакүхо аваргын нэр банцүкэгаас гарлаа. Ганцаараа ёкозүна цолтойгоор барилдаж эхэллээ. Энэ нь сэтгэл зүйн дарамт байв уу?

-Дэвжээн дээр тэр тухай бодох шаардлага байхгүй. Өнгөрсөн үетэй харьцуулбал ёкозүна цолтны орон зай, нэр сүрийг авч явах зүйл дээр улам хичээж явах ёстой гэж бодож байна.

-Ёкозүна цол хүртсэнийхээ дараа хоёр башё дараалан түрүүлсэн амжилтаараа Тайхо аваргын амжилттай зэрэгцлээ. Энэ талаар юу хэлэх вэ?

-Нэг өдөр, нэг барилдаан гэдэг сэтгэл зүйгээр барилдаж ирсэн нь энэ амжилтанд хүргэсэн байх аа.

-Маргааш  таны  30 насны  төрсөн өдөр тохионо. 30 настай жилийг ямар байна гэж бодож байна?

-Насны талаар бодмооргүй байна. Хамгийн гол нь чадах зүйлээ хийе гэж бодож байна.

-Ирэх жилийг ямар байна гэж төсөөлж байна вэ?

-Том мөрөөдөл, том зорилготой байгаа. Түрүүлсэн тоогоо хоёр оронтой болгохыг хичээнэ ээ. Амар биелэх зүйл биш. Өөрийгөө дайчилж барилдах бодолтой байгаа.

Б.Жаргал