Засгийн газраа эмхлэн байгуулсныхаа 100 хоног дээр Ерөнхий сайд Л.Оюун-Эрдэнэ “Улс төрийн болон захиргааны эрх мэдэл нэг хүний гарт төвлөрөх ёстой. Ерөнхий сайд ямбаа ч үүрдэг, ялаа ч эдэлдэг байх ёстой. Ялсан намын дарга нь гүйцэтгэх засаглалынхаа тэргүүн болдог нь дэлхийн жишиг. Энэ бол засаглалын хариуцлагатай холбоотой асуудал. Үүнийг цаашид хуульчлах ёстой. Тэгэхгүй бол намын тамгагүй Ерөнхий сайдтай байхын зовлонг бид харсан, туулсан. АН олонхи байх үед намын дарга нь З.Энхболд, Ерөнхий сайд нь Ч.Сайханбилэг байлаа. МАН олонхи байхад намын дарга нь М.Энхболд, Ерөнхий сайд нь Ж.Эрдэнэбат байлаа. Энэ гашуун түүхийг дахин давтах ёсгүй” хэмээж байлаа. Тэр үед (2021.05.10) МАН-ын дарга одоогийн Ерөнхийлөгч У.Хүрэлсүх байв. Харин Ерөнхийлөгчийн сонгуульд намын дарга У.Хүрэлсүх нэр дэвшиж ялалт байгуулснаар хуулийн дагуу намын гишүүнчлэлгүй болсон.

Улс төрийн ийм зайлшгүй нөхцөлд МАН-ын Бага хурал 2021 оны зургадугаар сарын 25-нд болж Ерөнхийлөгчөөр сонгогдсон У.Хүрэлсүхийг намын даргаас чөлөөлж, Л.Оюун-Эрдэнийг намын даргаар сонгосон юм. Ингэснээр Засгийн газраа байгуулсныхаа 100 дахь хоног дээрээ хэлж байсанчлан Ерөнхий сайд Л.Оюун-Эрдэнийн гарт улс төрийн болоод захиргааны эрх мэдэл төвлөрсөн.

Гэхдээ энд нэг асуудал байсан нь Л.Оюун-Эрдэнэ бол Бага хурлаар сонгогдсон намын дарга. Гэтэл МАН-ын дүрмээр бол намын даргыг Их хурлаар сонгох ёстой байдаг. Дүрэмд ингэж заасан боловч цар тахал хийгээд улс төрийн олон хүчин зүйлээс шалтгаалаад Их хурлынхх нь тов хойшлогдоод байв. Харин намын дотоод улс төрөө цэгцэлж чадсан МАН-ын одоогийн удирдлагууд Их хурлаа ирэх сарын 6-нд товлоод байна. Энэ Их хурлын хамгийн эхний асуудал нь мэдээж намын даргын сонгууль. МАН-ын Ерөнхий нарийн бичгийн дарга Д.Амарбаясгалангийн өнгөрсөн долоо хоногт хийсэн мэдээллээс харвал энэ Их хурлаар Л.Оюун-Эрдэнийг намын даргаар сонгосон Бага хурлынхаа тогтоолыг батламжилна. Өөрөөр хэлбэл, МАН-ын XXX Их хурлаар намын даргын өрсөлдөөн болохгүй гэсэн үг. МАН-ын дүрэмд “Намын даргыг Их хурлаар сонгох бөгөөд нэг Их хурлаас нөгөө Их хурлын хооронд намын даргын ор гарсан бол Бага хурлаар намын даргыг сонгоно. Дараагийн Их хурлаар батламжилна. Улсын Дээд шүүхэд бүртгүүлсэн намын дүрэмд ийм заалт байгаа” гэж МАН-ын Ерөнхий нарийн бичгийн дарга Д.Амарбаясгалан тодотгосон билээ. Тэгэхээр зургаа хоногийн дараа эхлэх МАН-ын Их хурлаар Л.Оюун-Эрдэнийг намынхаа даргаар сонгосон Бага хурлынхаа тогтоолыг л батламжлах нь. Эндээс ганц л дүгнэлт хийж болно. Зарим намын дарга хэн байхыг Улсын дээд шүүх, Улсын бүртгэлийн газар шийдэж байгаагаас өөр нь МАН-ын дарга хэн байхыг МАН л шийднэ.

О.Балдан-Очир