Налайх дүүргийн үндэсний бөхийн цол, чимэг олгох барилдаан болж өндөрлөлөө. Барилдаанд улсын начин Ц.Бямба-Очир болон аймгийн арслан гурав, заан хоёр, начин цолтой 13 бөх барилджээ. Энэ барилдаанд зодоглосон бөхчүүдийн хамгийн ахмад нь болох аймгийн арслан К.Канат нэг давсан байна. Тэгвэл аймгийн арслан цолтой хоёр бөх тавын даваанд унасан бөгөөд тэднийг давсан сумын заан Б.Бат-Хишиг аймгийн начин болж, аймгийн начин Б.Баатарболд чимэг нэмлээ. Энэ барилдаанд аймгийн начин С.Галданцогт түрүүлж, аймгийн арслан цолын болзол хангасан байна.

Харин түүнд унасан улсын начин Ц.Бямба-Очир үзүүрлэлээ. Гэвч нэг хүн энэ барилдааныг  таагүй харагдууллаа. Ц.Бямба-Очир энэ барилдаанд оролцох нь зохимжгүй юм. Барилдах нь тухайн хүний эрхийн асуудал боловч бусад аймгийн цолтнууд шиг нэрээ татаж болох байв. Налайхчууд хийгээд бөх сонирхогчдод лав таалагдаагүй. Анхнаасаа түрүүлэх зорилготой ирээгүй нь ойлгомжтой байсан. Цол авахгүйгээс хойш “наадам самарч” явах эрхийг түүнд хэн өгөв. Дүүргийн Засаг дарга, Дүүргийн бөхийн салбар хорооны удирдлагууд түүнийг бүртгэлд оруулахгүй байж болох л байсан. Гэвч тэгээгүй. Улсын цолтой бөх аймгийн наадам самарсан асуудлаас болж, өнгөрсөн зун нэгээр тогтохгүй аймгийн цол, чимэг олгох барилдааныг хүчингүй болгосон удаатай билээ.   

Б.Жаргал