АНУ-д 2018 оноос оршин суух болсон Монгол Улсын иргэн О бусдын интернет банканд хууль бусаар удаа дараа халдаж их хэмжээний мөнгө залилж, орлогын эх үүсвэрээ болгож байжээ.

Түүнийг Монгол Улсын Эрүүгийн цагдаагийн албаны Кибер гэмт хэрэгтэй тэмцэх хэлтсээс интерполын шугамаар олон улсад эрэн сурвалжилж байсан. Улмаар АНУ-ын хууль сахиулах байгууллагаас Монгол Улсын иргэн О-г саатуулж энэ сарын 1-ний өдөр тусгай үүргийн онгоцоор эх оронд нь албадан илгээжээ.

Цагдаагийн байгууллагаас уг этгээдийг иргэдийн интернет банканд удаа дараа хууль бусаар халдаж, их хэмжээний хохирол учруулсан хэрэгт яллагдагчаар татан, цагдан хорих таслан сэргийлэх арга хэмжээ авчээ.

Сэжигтэн О нь 2019 оноос эхлэн АНУ-аас Монгол Улсын иргэдийн интернет банк руу халдаж 100 гаруй удаагийн үйлдлээр тэрбум гаруй төгрөгийн хохирол учруулсан гэж Цагдаагийн ерөнхий газраас мэдээллээ.