УИХ дахь МАН-ын бүлэг хуралдаж, хурлаас гарсан шийдвэрийг УИХ-ын гишүүн Д.Тогтохсүрэн танилцууллаа. Тэрбээр “МАН-ын бүлгийн хуралдаанаар хоёр асуудлыг хэлэлцсэн. Нэгдүгээрт, өнгөрсөн долоо хоногт УИХ-аар хэлэлцсэн Засгийн газраас өргөн барьсан Холбооны эрх зүйн байдлын тухай хуулийн шинэчилсэн найруулгын төсөл, Сангийн тухай хуулийн шинэчилсэн найруулгын төслийг МАН-ын бүлгийн хурлаар хэлэлцэж шийдсэн байгаа. Энэ асуудлаар МАН завсарлага авсан. Хууль зүй, дотоод хэргийн сайд Х.Нямбаатарын зүгээс мэдээлэл өгсөн, гишүүдийн асуултанд хариулсан. Гишүүд Холбооны эрх зүйн байдлын тухай хууль, Сангийн эрх зүйн байдлын тухай хуулийн шинэчилсэн найруулгын төслийг үзэл баримтлалын хувьд дэмжсэн шийдвэр гаргасан. Олон гишүүн оролцуулах шаардлагатай юм байна. Хэлэлцэх эсэхийг дэмжиж, ажлын хэсэг байгуулаад Хаврын чуулганаар энэ хуулийг эцэслэн батлах нь зүйтэй гэж үзсэн. Хоёрдугаарт нь, Бүлгийн хуралд МАН-ын дарга, Ерөнхий сайд Л.Оюун-Эрдэнэ  хүрэлцэн ирж мэдээлэл хийсэн. Мэдээлэлдээ нэгдүгээрт нь гадаад нөхцөл байдал буюу Казахстан, БНХАУ-ын нөхцөл байдлын талаар, тэнд байгаа манай улсын иргэдийн асуудлаар мэдээлэл хийсэн. Хоёрдугаарт улс орныхоо нөхцөл байдлын талаар мэдээлэл хийлээ. Дотоод нөхцөл байдлын тухайд үнийн өсөлтийн чиглэлээр арга хэмжээ авах шаардлагатай гэж УИХ, Засгийн газар үзэж байгаа.  Тэтгэвэрийг нэмэх чиглэлээр Засгийн газар тодорхой судалгаа, тооцоолол хийж байна. Хил гаалийг үргэлжлүүлэн ажиллуулах, бараа бүтээгдэхүүний хомсдол үүсгэхгүй байх чиглэлд онцгой анхаарах үүднээс Замын-Үүдэд тодорхой арга хэмжээ авах шаардлагатай гэж үзсэн. Мөн утааны асуудлаар нэлээд асуудлыг ярилцсан" гэлээ.

Б.Жаргал