Шүүхийн хууль бус үйл ажиллагаанаас хохирсон иргэн Б.Хандсүрэн өмгөөлөгчийн хамт мэдээлэл хийлээ. Тэрээр, “Миний хувьд бүлэглэлийн гэмт хэргийн эсрэг шүгэл үлээж явсан. Гэтэл миний хүүг өнгөрсөн дөрөвдүгээр сард хууль бусаар баривчилж нэг хоног эрүүдэн шүүсэн. Яагаад хууль бус вэ гэвэл ямар нэг мөрдөн байцаагчийн тогтоол үндэслэлгүй шүүсэн. Иргэний эрхийн төлөө шүгэл үлээсэн хүний хүүхдийг ямар асуудал хүлээж байгаа вэ гэдгийг, мөн шүүгч нарын хууль бус үйл ажиллагааг ил болгохын тулд  хэвлэлд хандлаа. Бүлэглэлийн асуудал одоо хүртэл байсаар байна. Зохион байгуулалттай, хилс хэргээр хүмүүс хохирогч болж байна” гэв.

Өмгөөлөгч С.Болорчулуун: Иргэн Б.Хандсүрэнгийн хэрэг дээр ажиллаж байхад шүүх болон хуулийн байгууллагаас процессийн алдаа  гарсан. Үүнийг нийтэд ил болгохгүй бол хэргээ шийдүүлэх гэж байгаа иргэдийн эрх зөрчигдөж хохирогч болсоор байна. Шүүгчид шүүх хурлын дундуур гарч орох, шөнийн цагаар шүүх хурал явуулах, шүүгдэгчийн эцсийн үгийг хэлүүлэхгүй байх зэргээр эрхийг нь зөрчсөн. Мөн БЗД-ийн анхан шатны шүүхээс зохих хугацаанд шүүхийн шийдвэр, хурлын тэмдэглэл гараагүй. Миний зүгээс шүүгч Ч.Алтанцэцэгт зохих хугацаанд шийдвэр гарсангүй гэх хүсэлт тавихад “Чи хамт ажиллаж байсан хүнээ АТГ- шалгуулж байсан юм билээ. Чиний хувийн байдал үүнээс харагдаж байна. Цаашдаа өмгөөлөл хийх юм байгаа биздээ” гэх зэргээр өмгөөлөгчийн хараат бус байдалд нөлөөлсөн. Үүний дараа хуульд байхгүй зүйлээр буюу өмгөөлөгчид мэдэгдэлгүйгээр шүүхийн шийдвэрт засвар оруулсан байсан.

Т.Мөнхжаргал