Манай сайтын редакцад нэгэн бизнес эрхлэгч хандаж, хөл хорионы үеэр дампуурсан талаараа байр сууриа илэрхийллээ. “Анар, Анир” ХХК-ийн захирал Ө.Билгүүнтэй ярилцсанаа хүргэе.

-Өөрийн бизнесийн талаар манай уншигчдад товч танилцуулахгүй юу?

-Би модон саравч, сүүдрэвч хийж, бизнесийн анхны гараагаа эхлүүлсэн. 2019 оноос бизнес маань өргөжиж, гурван ажилтантай болсноор гаднах тохижилт, модон эдлэлээр тавилга хийдэг болсон.

-Ямар шалтгаанаар манай сайтад хандах болов?

-Ковидоос шалтгаалсан хөл хорионы үеэр бизнест маань хүндрэл учирснаар ажилчдын цалинг өгөхөд хүнд болж, банк бусын зээл гээд 60 орчим сая төгрөгийн өрөнд орсон, тэгээд дампуурсан.

-Дампуурахад нөлөөлсөн зүйлээ илүү дэлгэрэнгүй хэлж өгнө үү?

-Хилээр бараа бүтээгдэхүүн оруулахгүй удаж, үйлчлүүлэгчдийн захиалга удааширсан. Ингээд би нэг өдөр залилангийн хэрэгтэн болдог юм байна. Улмаар намайг хорих 461 дүгээр ангид хоёр сар хорьсон. Үйлчлүүлэгчдийнхээ урьдчилгааг аваад бүтээгдэхүүнээ хугацаанд нь өгөөгүйгээс хоригдох болсон.

-Та тэр урьдчилгааг юунд зарцуулсан бэ?

-Ажилчдын цалин, барааны захиалгад зарцуулсан. Үнэн нь тэр. Тэгээд түүхий эдгүй болохоор бүтээгдэхүүн гарч чадахгүй болж байгаа юм. Үүний дараа би залилангийн хэрэгтэн болсон. Надтай адил хувиараа бизнес эрхэлдэг олон залуус ингэж хохирч байна. Ерөнхийдөө бараа нь ирэхгүй удсанаас болж залилагч гэх нэр зүүж байна.

-Танай агуулахад түүхий эдийн нөөц хэр байгаа вэ?

-Нөөц дууссан. Түүхий эд авая гэхээр үнэ нь тэнгэрт хадчихсан. Ийм л байна. Өнгөрсөн жил хоёр метрийн урттай цэвэр сортын 1 куб банз 110 мянга байсан бол одоо хамгийн бохир сорт гэхэд 280 мянга байна. Мөн модон материалын үнэ өсөж, барилгын мк-ын үнэ дагаад нэмэгдлээ. 10 жилийн өмнө авч байсан цалин өөрчлөгдөөгүй, харин бараа материалын үнэ хэд дахин нэмэгдсэн байна шүү дээ.

-Хэрэглэгчид тань энэ зовлонг ойлгох юм уу?

-Тэд энэ асуудлыг мэддэг ч хувиараа бизнес эрхлэгчдийн зовлонг ойлгодоггүй.

-Үнэ өссөн бас нэг жишээ дурдвал?

-Түүхий эдийн үнэ материал, хэмжээнээсээ хамаараад 350 мянгаас дөрвөн сая төгрөгт багтаж байв. Энгийн стандарт сүүдрэвчийн түүхий эд гэхэд 700 орчим мянгад авч байсан бол 2.1 сая төгрөг болж өсчээ. Гэвч өмнөх чанартаа хүрэхгүй байна. Энэ бидний ажлын хамгийн том саад юм. Чанаргүй материал авахаас өөр гарцгүй болсон ч бид өөрсдийн боломжинд нийцүүлэн хэрэглэгчдэд эвдрэхээгүй болгоод л өгдөг. Төр засгаас залуусаа дэмжих бодлого дутмаг тул бизнес эрхлэгч залуус энэ мэт зовлон их тулгарч байна.

-Та энэ талаар холбогдох хүмүүст саналаа хүргүүлсэн үү?

Үгүй.

-Цаашдаа яах бодолтой байна?

-Намар хоригдсон асуудал шүүхийн шатанд явж байгаа. Хэрэв үлдсэн зээлээ төлчихвөл хоригдохгүй салах юм. Гэхдээ л миний амьдралд нэг хар толбо үлдлээ.

-Таны бодлоор залуусыг яаж дэмжвэл зүгээр вэ?

-Мөнгө төгрөг өгөөч гэхгүй. Бизнес эрхлэгчдээ хамгийн гол нь дэмжих хэрэгтэй. Дэмждэггүй юм бол саад болмооргүй байна. Залуус хичээж байхад төр нь дорвитой шийдвэрт хүрэхгүй байсаар залуусыг ийм асуудал руу оруулж байна. Үүнийгээ хүлээн зөвшөөрөх хэрэгтэй. Үнийн хөөрөгдөл, цалингийн хэмжээ гээд энэ асуудлууд дунд амар тайван амьдрах боломж алга.

Т.Мөнхжаргал