Коронавуруст халдварын нөхцөл байдлын талаар Эрүүл мэндийн яамны зөвлөх О.Батбаяр мэдээлэл хийлээ. Тэрбээр “Сүүлийн 30 хоногт дэлхий даяар 357 мянган генийн дараалал тогтоох шинжилгээ хийсэн байна. Эдгээр шинжилгээнээс  59 хувь нь омикроны хувилбар байгааг зарлажээ. Харин Монгол улсын хувьд 70 орчим хувийг омикроны хувилбар эзэлж байгааг ХӨСҮТ-ээс мэдээллээ. Дельта хувилбарын оргил үед 22 мянга орчим иргэн эмнэлэгт хэвтэн эмчлүүлж байжээ.

Маш хүнд ангилалд 300 орчим хүн багтаж байсан. Одоогийн байдлаар 5300 өвчтөн эмнэлэгт хэвтэн эмчлүүлж байна. Үүний 35 тохиолдол нь маш хүнд ангилалд байна. Эдгээрийн дийлэнх нь вакциндаа бүрэн хамрагдаагүй хүмүүс байна.  Өнгөрсөн хоногт 2010 тохиолдол бүртгэгдсэн. Үүнээс гурван нас баралт бүртгэгдсэн байна. Манай улсын хувьд вакцины хамрагдалт өндөр, өвчилсөн хүмүүсийн тоо өндөр, вакцины дөрөвдүгээр тунгийн хамрагдсан хүмүүсийн тоо өндөр учраас харьцангуй хөнгөн хүрч байна. Манай улстай төстэй нөхцөл байдалд байгаа Их Британи улсад нэг сарын дараагаас тохиолдлын тоо 13 хувиар буурсан байна” гэв.

Д.Батчулуун