БНСУ-ын Янгсан хотын дунд сургуульд сурдаг Монгол Улсын иргэнтэй үе тэнгийнх нь хүүхдүүд зүй бусаар харьцсан тухай бид өмнө нь мэдээлсэн.  Тэгвэл уг хэргийн анхан шатны шүүх хуралдаан 2022 оны нэгдүгээр сарын 13-ны өдөр Ульсан хотын эрүүгийн хэргийн анхан шатны шүүхэд явагдаж, хэрэгт холбогдогч 4 иргэнд тус бүр 6 сарын хорих ял оноох шийдвэрийг гаргажээ.

Тухайлбал, 2021.11.27-нд  Ульсан хотын прокурорын зүгээс яллагдагч 2 охиныг насанд хүрээгүй гэдэг шалтгаанаар ялаас чөлөөлж, үлдсэн 2 охиныг эцэг эхийн хяналтад  байлгах ял шийтгэлийг төлөвлөсөн байжээ. Харин  БНСУ дахь Гадаад иргэдийн эрхийг хамгаалах ТББ болон  хохирогч охины эцэг эхийн зүгээс БНСУ-н хэвлэл мэдээлэлд гомдол гаргасан байна. Үүний үр дүнд  Солонгос улсын үндэсний телевизүүд ( SBS, MBS, JTBC)-ээр  уг хэргийн талаар цацагдаж, шүүхийн шийдвэрт нөлөөлжээ.