Сэтгүүлч У.Оргилмааг улстөрч Ё.Отгонбаяр "ална" хэмээн заналхийлсэн талаар сэтгүүлч У.Оргилмаа дэлгэж, улмаар Эрүүгийн цагдаагийн газар хандаад байв. Улстөрч Ё.Отгонбаярын энэ увайгүй үйлдлийг эсэргүүцэж Монголын сэтгүүлчдийн нэгдсэн эвлэлээс ч мэдэгдэл гаргаад байлаа. Өнөөдөр Ё.Отгонбаярын эл заналхийлэлтэй холбоотойгоор хэсэг сэтгүүлч хэвлэлийн хурал зарлаад байгаа. Харин сэтгүүлчийг "ална" хэмээн заналхийлсэн улстөрч, Боловсролын сайд асан Ё.Отгонбаяр өнөөдөр сэтгүүлч У.Оргилмаа, Н.Өнөрцэцэг нараас өөрийн цахим хуудсаар дамжуулан  уучлал гуйлаа. Тэрбээр, "Өчигдөр би бухимдахдаа ёс зүйгүй үг хэрэглэжээ. Иймд зүй бус үг хэрэглэсэндээ харамсаж байна. Албан ёсоор сэтгүүлч У.Оргилмаа, Н.Өнөрцэцэг нараас уучлалт гуйж байгааг минь хүлээн авна уу" гэжээ.

Улстөрч Ё.Отгонбаярын эхнэр Ш.Батнасангийн эзэмшлийн компани Хөгжлийн банкнаас их хэмжээний мөнгө зээлээд эргэн төлөхгүй, найдваргүй зээлдэгч болсон тухай мэдээллийг zarig.mn сайт бэлтгэн хүргэсний дараа тэрбээр сэтгүүлч У.Оргилмаа руу заналхийлсэн зурвас илгээсэн билээ.

С.Сүлд