Сэтгүүлчдийн амь насанд заналхийлсэн асуудлаар сэтгүүлчид мэдээлэл хийлээ. Энэ үеэр сэтгүүлч Ч.Лодойсамбуу үг хэллээ. Тэрбээр “Отгонбаяр сайдын өөрийнх нь ажиллаж байсан АНУ-ын ганцхан жишээг дурдъя. АНУ-ын ерөнхийлөгчийн хэвлэлийн албаны дэд дарга өөртэй нь холбоотой баримт дэлгэх гэж байсан хүн рүү утсаар яриад “би чамайг устгана шүү” гэж хэлсэн. Сэтгүүлч энэ хүнд гомдол гаргасан. Хариуд нь яг энэ Отгонбаяр шиг тэр хүн сэтгүүлчээс уучлалт гуйсан. Тэр хүний цалинг нь бууруулсан, албан тушаалаас нь буулгасан, дараа нь бүр хуулийн хариуцлага хүлээлгэсэн. Харин энэ бол мессежээр баримттай хэлсэн байна.  Бид хэрэглээндээ “ална шүү” гэдэг үгийг хэрэглэдэг. Тухайлбал, тэмцээнд орохдоо  “алаад өгье”, хоорондоо тоглохдоо “ална шүү чамайг” гээд тоглодог. Гэтэл энэ бол хошигноод, зүйрлэж хэлээд байгаа зүйл бол огт биш. Ер нь цагаан толгойтой хүмүүс энэ сандал дээр сууж байгаад л “Ална шүү” гээд илт хэлдэг болсон. Одоо төрийн сайд байсан хүн ингэж мессеж бичиж байна. Энэ бол маш том зүйлийн дохио. Хөгжлийн банкны зээлтэй холбоотой 1,3 их наяд төгрөгийн чанаргүй зээл бий. Үүний 840 тэрбум төгрөгийн чанаргүй зээл ил болж байна. Дахиад 500 тэрбум төгрөгийн чанаргүй зээлтэй холбоотой асуудал дэлгэгдэнэ. Үүнийг ярих болгонд бид нарыг алах юм уу. Тэрийг ил болгосон хүмүүс рүү “ална шүү” гэж бичих юм уу. Зээлийн 55 хувь нь чанаргүй болчихдог ийм банк оршин тогтнох боломжгүй. Монголын төр олон нийтээс зам дээр зогсож хурааж авсан мөнгөнүүдээ ингэж хурааж авахаараа болдог. Ийм зүйлийг бид эсэргүүцнэ. Цаашид энэ асуудалд олон хүмүүсийн нэр дурдагдана. Энэ болгон дээр сэтгүүлчдээ хөнөөлгөчихмөөргүй байна” гэв.