Засгийн газрын хуралдааны шийдвэрийг танилцуулж байна. Хөгжлийн банкны чанаргүй зээлтэй холбоотой мэдээллийг  Сангийн сайд Б.Жавхлан танилцууллаа. Тэрбээр “Засгийн газрын хуралдаанаар Хөгжлийн банкны чанаргүй зээл болон бусад зээл хэрхэн төлөгдөж буй талаар танилцууллаа. Мөн цаашдаа хөгжлийн банкны чанаргүй зээл дээр хэрхэн ажиллах талаар мэдээлэл хийлээ. Хөгжлийн банкны чанаргүй зээл нийт 201 тэрбум төгрөгөөр төлөгдсөн.

Мөн “Кью Эс Си” компани 60 тэрбум төгрөг төлөхөө мэдэгдсэн. Ингэснээр нийт 261 тэрбум төгрөг төлөгдөж байгаа юм. Засгийн газрын хувьд хөгжлийн банканд анхаарал хандуулсан гол учир шалтгаан бол дараа жил төлөгдөх хоёр бондын асуудал байгаа юм. Евро бонд нь 1,5  их наяд, 2023 оны арванхоёрдугаар сарын 25-нд төлөгдөх 713 тэрбум төгрөгийн өр буюу Самурай бонд. Бидний онцгой анхаарах зүйл бол Самурай бонд байгаа юм. Үүнийг хөгжлийн банк төлж чадахгүй бол энэ өрийг Засгийн газар төлнө. Тийм учраас ийм эрсдэлтэй тулахгүйн тулд чанаргүй зээлийг яаралтай төлүүлэх шаардлага тулгарсан.

Цаг хугацааны хувьд энэ оны зургаадугаар сарын 30, арванхоёрдугаар сарын, арванхоёрдугаар сарын 30 гэсэн хугацаа бий.  Арванхоёрдугаар сарын 30-с өмнө Хөгжлийн банкны чанаргүй зээл төлөгдөхгүй байсаар тайлан муу гарвал Хөгжлийн банкийг татан буулгана.  Энэ жилдээ чанаргүй зээлийн 800 тэрбум төгрөгийг төлүүлэх төлөвлөгөөтэй байна. Одоогоор цугларсан 260 тэрбум төгрөг нь Самурай бондын 30 хувьд нь хүрнэ. Хөгжлийн банк дээр үүссэн ТӨҮГ-тай холбоотой зээлийг хэрхэн төлүүлэх талаар дараагийн хурлаар шийдвэрлэж мэдээлнэ” гэв.

Д.Батчулуун