УИХ-ын чуулганы нэгдсэн хуралдаан Монгол Улсын хөгжлийн 2023 оны төлөвлөгөө батлах тухай тогтоолын төслийг үргэлжлүүлэн хэлэлцэж байна. УИХ-ын гишүүдийн асуулт хариултыг хүргэж байна

УИХ-ын гишүүн Г.Мөнхцэцэг: Говийн зам там шиг байна. Сүүлийн жилүүдэд говийн замаар гарч байгаа эрдэс баялагийн замыг ярьсанаас биш иргэдийн зорьчиж байгаа замыг сайжруулж шинэчилж байгаа зүйл бараг хийгдээгүй.  Замын-Үүдээс Алтанбулаг хүртэлх төв зам хэд хэдэн аймгийн нутаг дэвсгэрийг дайрч өнгөрч байгаа. Ялангуяа Дорноговь-Говьсүмбэр-Улаанбаатар чиглэлийн зам хамгийн их эвдрэлтэй.  Мөн Өмнөговь-Дундговь-Улаанбаатар чиглэлийн зам үнэхээр там болсон. Маш олон осол аваар болж байна. Энэ замд мал хүртэл ороод хэвтчихдэг нүх болсон. Чойрын хэвтээ тэнхлэгийн замын ажлын төсөв хоёр тэрбум төгрөг төсөвлөөд танай яаман дээр ажил болоод явсан. Энэ зам юу болов оо?

Зам тээвэр, хөгжлийн яамны сайд Л.Халтар: Өмнөговь,  Дундговь чиглэлийн зам хүнд байна. Бид өнгөлөн далдлах байдлаар замын засвар хийдэг, энэ нь буцаад богино хугацаанд сүйрдэг. Улаанбаатар руу тээвэрлэж байгаа шахмал түлшний түүхий эдтэй холбоотой. Үүнийг эрчим хүчний яамтай ярьж байгаа. Хотын зүүн талд байгаа үйлдвэр дээр вагоноос буулгах өндөрлөсөн зам барих ёстой ч хараахан баригдаагүй байгаа учир шууд төмөр замруу оруулаад тээвэрлэхэд хүнд байна. Харин Өвөрхангай-Мандалговь-Чойр чиглэлд техник эдийн засгийн үндэслэл боловсруулагдсан, зураг хийгдэх ёстой. Зураг дагаж төсөв гарна. Иймд  цаашдаа хамтраад явах ёстой болж байна. Бодлогын хувьд дэмжигдэх ёстой зам. Чойр яах аргагүй нүүрсний цэг болсон. Чойрыг хоёр дахь Цагаан хад болгомооргүй байна. Энд есөн салаа зам дээр  640 мянган тонн нүүрс бий. Тиймээс Цогтцэцийгээс гарч байгаа Таван толгойн нүүрсний тээврийг зогсоосон. Зам тээвэр, хөгжлийн яамнаас цаашдаа нүүрсний задгай тээвэр явуулахгүй гэдэг дээр хатуу байр суурьтай байгаа" гэв. 

Т.Мөнхжаргал