Засгийн газрын өнөөдрийн ээлжит хуралдаанаар Улаанбаатар хотын нийтийн тээврийг шинэчлэх асуудлыг хэлэлцсэн бөгөөд Ерөнхий сайд 2024 оныг хүртэл нийтийн тээврийн хэрэгслийг бүрэн шинэчлэх чиглэл өгчээ. Нийтийн тээврийн шинэчлэлийн талаар нийслэлийн Засаг дарга Д.Сумъяабазар мэдээлэл өгч байна. Тэрбээр, Улаанбаатар хотод төр, хувийн хэвшлийн 1200 орчим тээврийн хэрэгсэл нийтийн тээврийн үйлчилгээнд явж байна.Тийм учраас Улаанбаатар хотод нэн шаардлагатай байгаа тээврийн хэрэгслийн парк шинэчлэлийг хоёр үе шаттайгаар хийж хэрэгжүүлэх үүрэг чиглэл өгсөн. 2021 оны улсын төсөв дээр нийтийн тээврийн хэрэгслийн шинэчлэлийг төлөвлөсөн боловч коронавирусын нөхцөл байдлаас болоод хойшилсон.

Мөн Улаанбаатар хотын хэмжээнд энэ оны сүүлээр ашиглалтаас хасагдах тээврийн хэрэгслийн тоо 975. Парк шинэчлэлийн хүрээнд 591 автобусыг төр, хувийн хэвшлийн хүрээнд худалдан авахаар бэлдсэн. Тодорхой зээлийн эх үүсвэртэйгээр хоёр жилийн хугацаанд төлж барагдуулах чиглэлтэй ажлуудаа уялдуулж байгаа. 40 орчим сая долларын зээлийн эх үүсвэрийг ашиглалтаар төлж дуусахаар санхүүгийн схем гаргасан. Нийт 975 орчим нийтийн тээврийн шинэчлэх шаардлагатай байгаа. Үүнээс 591 ширхгийг нь наймдугаар сарын 20-ны дотор татан авах үүргийг холбогдох албаныханд өгсөн" гэв.

Д.Батчулуун