Үндэсний соёл амралтын хүрээлэнгийн галзуу хулгана дээр цөөхөн хэдэн секунтэд аюулгүй байдлаа хангаад суудаг нийслэлийн иргэд бид өдөр бүр галзуу хулганаар ямар ч хамгаалах хэрэгсэлгүй зорчдог. Энэ байдал маш олон жил үргэлжилж байгаа ч одоо хүртэл хэвээр. Автобус баазын жолооч нар ямар байдалтай явдгийг хүн бүр ярьдаг, хэлдэг ч нийтийн унаагаар зорчдоггүй хотын дарга нар сууж үзээгүй учраас ойлгохгүй одоог хүртэл шийдвэрлэж чадаагүй биз ээ. Ганц л удаа хэвлэл мэдээллийн хэрэгсэл дагуулахгүй, зарлахгүй, мэдээ бичихгүйгээр “Олны дунд орж нийтийн тээврээр зорчиж үзээч” гэж хүсмээр байна. 

Зорчигч хаяж явдаг, хаалгаар орж байхад нь автобус явж байдаг эсвэл зорчигчийн цүнх, хувцас хаалгандаа хавчуулаад хөдөлдөг энэ “галзуу” үзэгдлийг зөвхөн монголд л харж болох. Үүний нэг тод жишээ өчигдрийн хүний амь эрсэдсэн харамсалтай үйл явдал.

Нөгөө талаас жолооч нарын ч асуудал байж болох нийтийн тээврийн болоод, машин техникийн хэрэгсэл барьж, замын хөдөлгөөнд оролцож буй хүн бүрийн хариуцлага, хатуу дүрэм журмаа мөрдүүлэх явдал. Бүр цаашилбал жолооны сургалтаас ямар жолооч нар бэлтгэгдэж зам тээврийн хөдөлгөөнд оролцож байгаа гэх мэт асуудлыг ухвал олон тал бий. Гэсэн ч нийтийн тээвэр ямар байдалтай зорчдогийг хүн бүр шүүмжилдэг. Шүүмжилсээр багагүй он цагийг ч үдлээ. Автобуснууд “Та бариулаас сайн барьж явна уу. Өөрийн буруугаас болж гэмтэж бэртсэн бол бид хариуцлага хүлээхгүй” гэсэн бичиг наачихаад ёстой л нэг сүлжиж тоглоно. Шинэ жолооч нар хүртэл “Автобус хажуугаас шахаж, энд тэндээс дураараа орж ирэхээр сандраад асуудал үүсдэг” гэдгийг ч хэлдэг. Хэлсээр, ярьсаар бүр зорчсоор өнөөдөр байдаг л нэг асуудал шиг хэвийн үзэгдэл болжээ.

Тээврийн Цагдаагийн албанаас өчигдөр өдрийн 12:00 цагийн орчим БЗД-ийн нутаг дэвсгэрт 23-р хороо, улиастай руу эргэх зам дээр нийтийн тээврийн автобус, том оврын машин мөргөлдсөн дуудлага мэдээллийн дагуу цагдаагийн байгууллагаас шалгалтын ажиллагааг явуулж байгаа талаар мэдэгдэл гаргасан.

Тодруулбал, Daewoo маркийн автобус улиастайн уулзвараас хойш 200 метр орчим зайд Киа бонго маркийн ачааны автомашинтай мөргөлдсөн зам тээврийн осол гарч Киа бонго маркийн автомашины жолоочийн амь хохирсон ноцтой зам тээврийн осол гарсан байна. Ослын газарт цагдаагийн болон 103, 105-ын бүрэлдэхүүн дуудлагын дагуу ажиллаж байгааг мэдэгдэлд дурджээ. Хэнийх нь ч зөв, буруу байсан энэ асуудлыг хэрхэн шийдвэрлэх вэ хотын дарга аа. Хэрхэн урьдчилан сэргийлж нийслэлийн хүндэт иргэдийнхээ эрүүл мэнд, амь насыг хамгаалах вэ?

Өнөөдөр хотын дарга Нийтийн тээврийн смарт картыг болиулж, хэмнэлтийн горимд шилжиж, үндэсний компаниудаар нийтийн тээврийн цахим шилжилтийг хийх төлөвлөгөөгөө танилцуулсан. Смарт картаа хэзээ ч шинэчилж болно. Харин хамгийн түрүүнд хир даг болсон бохир автобусаар биш цэвэр, аюулгүй тээврээр зорчмоор байна. Дараа нь смарт картын асуудлаа шийдвэрлэж болох уу. Ажлын төлөвлөгөөгөө чухлаас нь эхэлж хийдэг бол хүний амь нас, эрүүл мэндтэй холбоотой асуудлыг төлөвлөгөөнийхөө НЭГДҮГЭЭРТ  томоор тэмдэглэж биднийг аюулгүй зорчуулахыг хичээнгүйлэн хүсэж байна. Смарт карт, замын түгжрэлийг бууруулах дараагийн асуудал болов уу?

Нийслэлийн галзуу хулганаар зорчигч.

Ц.Баасан